Һыйырҙар фермаға ҡайтты

Беҙ хужалыҡҡа барған үткән йомала Первомайҙан һауын һыйырҙарҙы Гусевкаға кире алып ҡайттылар. Бының өсөн көрәк таҡҡан тракторҙар ҡырып үткән юлдан бер көтөүсе һыбай, икенсеһе егелгән санала ҡыуҙы. Шул уҡ юлдан бер аҙ торғас, Юлдашҡа Первомайҙан алып барған башмаҡтарҙы кире ҡыуҙылар. Сөнки, хужалыҡ етәксеһе әйтеүенсә, Юлдаш фермаһындағы малдарға аҙыҡ ташып ашатылғанлыҡтан, малдарҙы унда тотоу ҡиммәткә төшәсәк. Ә Первомайҙа бесән-һалам етерлек тупланған, шуға күрә башмаҡтарҙы кире ҡайтарыу отошлораҡ.

— Зыян күргән бинаны ҡайтанан тергеҙеүгә ике миллион һумдан ашыу аҡса китте. Әлбиттә, Гусевтағы малды тотоноп, тик ҡырсылыҡ менән шөғөлләнергә лә була ине. Тик ошо комплекста эшләгән кешеләрҙе ҡайҙа ҡуймаҡ кәрәк? Улар ҙур булмаһа ла эш хаҡы алып, шуның менән йәшәп киләләр бит. Шуға күп сығымдар талап ителһә лә, һауын залын ҡайтанан тергеҙҙек. Был маҡсатта ҙур суммала кредит алырға ла тура килде, — тип дауам итте Ғамир Сәлмән улы.

Шулай уҡ хужалыҡ тулы көсөнә эшләһә, Гусев ауыл биләмәһенә ҡараған ауылдар халҡы мәнфәғәтендә лә ярайһы уҡ эштәр башҡарыла. Мәҫәлән, ауыл биләмәһе хакимиәте менән килешеү нигеҙендә Гусев, Борисовка ауылдары урамдарын хужалыҡ тракторҙары таҙарта. Ауылдарҙа ойошторолған бөтә сараларға, байрамдарға бағымсылыҡ итә хужалыҡ — ит менән, йә аҡсалата ярҙам күрһәтә.

Һауын һыйырҙар Первомайҙа булған бер айҙа һауынсылар Гөлсөм Минһажева, Зөлфиә Муллағәлинова, Луиза Астанғәлина Гусевтан көнөнә ике тапҡыр йөрөп һауғандар, уларҙы үҙ машинаһында көтөүсе Закир Минһажев ташыған. Шулай уҡ комплекста һауын һыйырҙарҙы тәрбиәләгән Николай Калашников менән Дамир Шәйәхмәтов та бер айға Первомай фермаһына күскән.

— Малдарҙы унда-бында күсереү уларҙың продуктлылығы кәмеүенә килтерҙе. Шулай ҙа яҡын арала һөт алыуҙы мөмкин тиклем арттырып, былтырғы йылдың ошо кимәленә еткерербеҙ, моғайын. Үҙ бурыстарын үтәүгә яуаплы ҡараған малсылар менән быға өлгәшеүе ҡыйын булмаҫ, — тип осраған ҡыйынлыҡтарға ҡарамаҫтан киләсәккә ҙур өмөттәр бағлай хужалыҡ етәксеһе.