+17 °С
Болотло
Антитеррор
Бөтә яңылыҡтар
А/хужалығы
20 Октябрь 2020, 12:38

Малсылар өсөн бөтә шарттар бар бында

«Красная Башкирия» ауыл хужалығы кооперативы районда ғына түгел, республикала ла иң күп һөт етештереүсе хужалыҡ булараҡ билдәле. АХК-ның Һамар, Покровка, Озерный фермаларында етештерелгән продукция юғары сифатлы булыуы менән айырылып тора.

«Красная Башкирия» ауыл хужалығы кооперативы районда ғына түгел, республикала ла иң күп һөт етештереүсе хужалыҡ булараҡ билдәле. АХК-ның Һамар, Покровка, Озерный фермаларында етештерелгән продукция юғары сифатлы булыуы менән айырылып тора.
Оҙаҡ йылдар Алексей Кощеев етәкселек иткән Ф. Солтанова исемендәге Озерный фермаһы тотороҡло һәм ышаныслы эшләүе менән алдыра. Ферма мөдире әйтеүенсә, бөгөн бында 240 һауын һыйыр аҫырала. Көн һайын Магнитогорск һөт заводына был ферма малсылары етештергән 5,5 тонна продукция оҙатыла. Өҫтәүенә, ошо базанан киткән һөт юғары сорт менән һатыла һәм ҡуйылығы 4,5 процент тәшкил итә икән.
Беҙ фермала булғанда мал аҙығы һәм аҙыҡҡа өҫтәмәләр етештереү менән шөғөлләнгән «Мустанг ашатыу технологияһы» компанияһы вәкиле Антон Ледовских менән ферма мөдире продукция алыуҙы тағы ла арттырыу өсөн рационды ҡайтанан ҡарау менән мәшғүл ине.
— Малсылыҡ алдына ҡуйылған бурыстарға өлгәшеү өсөн рационды тағы ниндәй өҫтәмәләр менән байытыу кәрәклеген ҡарайбыҙ, — тип аңлатма бирҙе Силәбе, Ырымбур өлкәләре, Башҡортостан буйынса консультант Антон Ледовских. Фирма вәкиле әйтеүенсә, ул комплекс етәксеһенә рацион төҙөргә ярҙам итә, был юҫыҡта килеп тыуған башҡа төрлө мәсьәләләрҙе лә бергәләп хәл итәләр.
Һыйырҙың һөтө — телендә тигән әйтем көнүҙәклеген юғалтмай. Бында ла малдарҙы ашатыу етди иғтибар үҙәгендә тотола. Хужалыҡта әҙерләнгән бөтә мал аҙығы Һамар фермаһы базаһында һаҡлана.
— Көн һайын иртәнсәк Һамарҙан килтерелгән мал аҙығы, аҙыҡ бутағыс аша үтеп, йәғни ваҡланып, болғанғандан һуң, малдарға һалына. Был яуаплы эш Тарас Кощеев иңендә: ул аҙыҡты бутағысҡа тейәй, унан һуң малдарға тарата, — тип һөйләй Алексей Константинович. — Киләсәктә хужалыҡ махсус машина һатып алһа, Һамарҙан мал аҙығы беҙҙең базаға тулыһынса әҙер көйө киләсәк.
Озерный фермаһында өсәр һауынсы сменалап эшләй, йәғни ике көн эшләһәләр, ике көн ял итәләр. Ферма мөдире билдәләүенсә, машина менән һауыу операторҙары Гүзәл Ғибәҙәтова, Земфира Камалова, Фәүҡинур Сабитова, Зөлфиә Мөхәмәҙиева, Рөстәм Муллағәлләмов һәм Анна Малахина, малсы Фәрит Яуынбаев һәр ҡайһыһы үҙ эшенә намыҫлы, яуаплы ҡараған эшселәр. Әйткәндәй, Анна Малахина быйыл ғына Троицк ветеринария академияһын тамамлаған Магнитогорск ҡалаһы ҡыҙы. Билдәле булыуынса, тотош хужалыҡта, шул иҫәптән был фермала ла эшселәр өсөн һәйбәт эш һәм йәшәү шарттары булдырылған. Ферма биләмәһендә малсылар өсөн бөтә уңайлыҡтар ҡаралған ятаҡхана бар. Малсылар әйтеүенсә, эш хаҡы ла зарланырлыҡ түгел.
— Уҙған айҙа бер нисә көн өҫтәмә ял алған һауынсыны алмаштырҙым. Уның ҡарауы, эш хаҡым юғары булды, — тип яңылығы менән уртаҡлашты Земфира Камалова. — Фермала эш араһында ял итеү, ашарға әҙерләү өсөн бөтә мөмкинлектәр бар. Ял итеү бүлмәһендә йылы иҙән, газ плитәһе, микротулҡынлы мейес, һыуытҡыс... Автомат кер йыуыу машинабыҙ боҙолғайны, етәкселеккә әйтеүебеҙ булды, яңыһын шул уҡ көндө алып килеп тә ултырттылар.
Быҙауларға тейешле һыйырҙар айырым базала аҫырала. Яңы тыуған быҙауҙарҙы фермала бер тәүлек тоталар ҙа, быҙауҙарҙы үҫтереүгә махсуслашҡан Һамарға оҙаталар. Был тәүлек эсендә уларға ыуыҙ һөтө эсерелә, ветеринар Александр Русин быҙауҙарға тейешле вакциналарҙы яһай. Үҫтерелгән үгеҙҙәр һимертеү өсөн Һамарҙан Үҙәк бүлексәгә оҙатылһа, таналар кире Озерныйға ҡайта-рыла. Бында инде яһалма ҡасырыусы Венера Кощеева йәш таналарҙы ферманың төп көтөүенә индерә, шулай уҡ улар роботлаштырылған фермалағы малдар һанын ишәйтеү өсөн дә оҙатыла. Әйткәндәй, хужалыҡ фермаларының бөтәһендә лә малдарҙы яһалма ҡасырыу ысулы уңышлы ҡулланыла.
Читайте нас: