Ауыл хужалығында эшләүсе йәш белгестәргә дәүләт ярҙамы

– 2025 йылдан "Аҙыҡ-түлек хәүефһеҙлеген технологик тәьмин итеү" яңы милли проекты старт ала, һәм уның сиктәрендә  "Агросәнәғәт комплексында кадрҙар” йүнәлеше тормошҡа ашырыласаҡ. Уның маҡсаты – 2030 йылға агросәнәғәт комплексы предприятиеларын 95 процентҡа тиклем йәш кадрҙар менән тәьмин итеү. Бының өсөн тармаҡҡа йәш белгестәр йәлеп итергә, улар өсөн ҡулайлы шарттар булдырырға кәрәк, – тип билдәләне Башҡортостандың Хөкүмәте Премьер-министры урынбаҫары – ауыл хужалығы министры Илшат Фәзрахманов.

Дәүләт ярҙамы алыуға конкурста ҡатнашырға теләүселәр Башҡортостандың агросәнәғәт комплексы ойошмаларында (ауыл ерендә) эшләргә тейеш. Ғариза һәм  документтар 2025 йылдың 22 ғинуарынан 7 февраленә тиклем БР Ауыл хужалығы министрлығында (Өфө ҡалаһы, Пушкин урамы, 106-сы йорт, 306-се бүлмә, 9.00 сәғәттән 18.00 сәғәткә тиклем, тәнәфес 13.00 - 14.00) ҡабул ителәсәк.

Белешмәләр өсөн телефондар: 8 (347) 218-05-40, 218-05-44.

БР агросәнәғәт комплексының кадрҙар потенциалына булышлыҡ итеү программаһы сиктәрендә дәүләт ярҙамы алыуға дәғүә итеүсе йәш белгескә түбәндәге талаптар мотлаҡ:

- 35 йәшкә тиклем;

- әҙерлек, һөнәр һәм квалификация йүнәлештәре буйынса юғары белем йәки урта һөнәри белемле булыуы;

- әҙерлек йүнәлешенә, һөнәренә һәм квалификацияһына ярашлы төҙөлгән хеҙмәт килешеүе булыуы;

- йәш белгестең агросәнәғәт комплексында алты айҙан кәм булмаған өҙлөкһөҙ хеҙмәт стажы булыуы;

Рәсәй Федерацияһы Ҡораллы Көстәре сафында хеҙмәт иткән (хәрби бурысы булғандар өсөн), шулай уҡ хәрби хеҙмәттән азат ителеү тураһында белешмә;

– үҙ өҫтөнә агросәнәғәт комплексы ойошмаһында кәм тигәндә өс йыл эшләргә йөкләмә алған;

- йәш белгес быға тиклем Указға ярашлы дәүләт ярҙамы алмаған булырға тейеш.