"Патриот" паркында көслө рухлылар йыйылды

"Патриот" хәрби-патриотик паркында һаулыҡ мөмкинлектәре сикләнгән малайҙар өсөн «Геройҙар биләмәһе» патриотик слеты үтте. Сарала бөтә республиканан йыйылған 9-14 йәшлек 135 малай ҡатнашты. Беҙҙең райондан Илмир Муллағәләмов (Асҡар) һәм Мөхәмәт Сәлмәнов (Буранғол) барҙы. Слет республиканың Мәғариф, Һаулыҡ һаҡлау, Хеҙмәт һәм халыҡты социаль яҡлау министрлыҡтары һәм "Бәхет биләмәһе" хәйриә фонды менән берлектә ойошторолған.

“Геройҙар биләмәһе” патриотик слеты беренсе тапҡыр уҙҙы. Ул Рәсәйҙәге Ғаилә һәм Башҡортостандағы Һаулыҡ мөмкинлектәре тураһында хәстәрлек йылдарында мөһим сараға әүерелде.  2019 йылдан йыл һайын республикала һаулыҡ мөмкинлектәре сикләнгән балалар өсөн “Аксаков шыршыһы” һәм “Бәләкәй принцессалар балы” үткәрелеп килә.

-“Бәләкәй принцессалар балы”н үткәргәндә һаулыҡ мөмкинлектәре сикләнгән малайҙарҙы “Патриот” паркына саҡырыу идеяһы тыуҙы, – тине  слетта республика Башлығы Радий Хәбиров. – Ысынлап та, уларға бында ҡыҙыҡ һәм мауыҡтырғыс, тимәк дөрөҫ ҡарар ҡабул иткәнбеҙ. Слетты даими уҙғарырға, күберәк балаларҙы саҡырырға һөйләштек. 

Сара сиктәрендә парк буйлап экскурсиялар, тематик оҫталыҡ дәрестәре һәм музыкаль квиз үткәрелде. Ата-әсәләр өсөн белгестәр менән консультациялар ойошторолдо. Бынан тыш, балаларға Эльбрус Ниғмәтуллин кеүек билдәле спортсы менән бергә зарядкала ҡатнашыу мөмкин булды.Слетта малайҙар тарихҡа, ижадҡа, спортҡа, хәүефһеҙлеккә, тирә-яҡ мөхиткә һәм робототехникаға арналған төрлө оҫталыҡ дәрестәрен ҡараны. Балалар һәм уларҙың ата-әсәләре слетты ойоштороусыларға ҡыҙыҡлы сара өсөн рәхмәт белдерҙе.