Рухлы, дәртле хәйриә концерты

Ижади төркөмдө Яңы Һамар клубы мөдире Лилиә Мөхөтдинова етәкләне. Ике сәғәтлек концерт бер тында юғары профессиональ кимәлдә үтте. Һәр номер ентекле әҙерләнгән, матур костюмдар һайланған, ихлас күңелдән сығыш яһанылар. Фәниә Йосопова, Ғәлимә Мөхөтдинова, Миләүшә Святкина, Гөлсәсәк Ғәлләмова, Хәснә Варисова һәм Рәхилә Хәйретдинованан торған «Миләш» ҡатын-ҡыҙҙар ансамбле моңло йырҙары менән әҫәрләндерҙе. Артистар бер иштән тектерелгән бай милли кейемдәрҙә сығыш яһаны. Фәниә Йосопова башҡарыуында рус йырҙары йырсы Надежда Кадышеваныҡынан һис ҡайтыш яңғыраманы. ХәснәВарисова һәм Гөлсәсәк Ғәлләмова «Ике ҡоҙаса» йырын башҡарҙы. Уҡыусы ҡыҙҙар – Әлиә Мөхөтдинова, Ивилина Мөхөтдинова һәм Гөлиә Рахмановатөрлөхалыҡтарҙың: татар, мордва, мари,
башҡорт, рус бейеүҙәрен күрһәтте һәм ысын артистар кеүек оҫта сығыш яһаны. Тамашасылар инструменталь ансамблде — ҡумыҙсылар, ҡалаҡтар һәм тәрилкәлә ритм һуғыусы музыканттарҙы көслө алҡыштар менән ҡабул итте. Әлиә Мөхөтдинова скрипкала уйнаны. «Байыҡ» республика бейеү фестивале еңеүселәре, гран-при яулаусы әсәле-ҡыҙлы Лилиә һәм Әлиә Мөхөтдиновалар конкурс өсөн билдәле хореографтары ҡуйған бейеүҙәрен тамашасы хөкөмөнә сығарҙы. Концертты музыкаль яҡтан Таштимер мәҙәниәт йорто мөдире Заһир Хызыров биҙәне. Һәр артистың сығышын тамашасылар йылы ҡаршы алды һәм алҡыштар менән оҙатты. Бер көнө йылды туйҙырыр мең хәстәрле миҙгелдә, йорт-хужалыҡ, ғаилә мәшәҡәттәрен ситкә ҡуйып, батырҙарыбыҙға ярҙам итәбеҙ тигән изге ниәттә концертҡа әҙерләнергә, репетицияларға йөрөргә ваҡыт тапҡан һәм беҙҙе иҫ киткес һоҡланғыс номерҙары менән әсир иткән Яңы Һамар ауылы һәүәҫкәрҙәренә ҙур рәхмәт. Эскерһеҙ ярҙамығыҙ һалдаттарыбыҙҙы һаҡлар ҡалҡан, еңеүҙе яҡынайтыр аҙым булһын. Илебеҙ халҡы, эшсәндәре менән
ҡеүәтле. Рәсәйлеләрҙең рухын анһат ҡына һындыра алмаҫтар, МХО барышында ла беҙ үҙ маҡсатыбыҙға ирешәсәкбеҙ.
                                                                                                                                                                                                                                                                                                                                                                                                                                               Рәйлә Хафизова.
                                                                                                                                                                                                                                                                                                                                                                                                                                               Салауат ауылы.