Министрҙар кабинеты башлығы, сараны асып, республикала бәләкәй һәм урта эшҡыуарлыҡ субъекттары һаны тотороҡло үҫә, тип билдәләне. Бөгөн улар 133 меңгә яҡын. Быйыл бындай бизнес-берәмектәр һаны 4 процентҡа, ә үҙмәшғүлдәр һаны 15 проценттан ашыуға артҡан. Беҙҙең эшҡыуарҙар быйыл 4 айҙа төбәк бюджетына 7 миллиард һум самаһы аҡса килтергән, был уҙған йылғы һөҙөмтәләрҙән 25 процентҡа күберәк. Былар барыһы ла берлектәге эштең һәм хөкүмәт менән бизнестың тығыҙ үҙ-ара эш итеүенең һөҙөмтәһе.
- Республикала хөкүмәт кимәлендә бәләкәй һәм урта эшҡыуарлыҡҡа ярҙам саралары комплексы тормошҡа ашырыла. Ағымдағы йылда был маҡсатҡа 1 миллиард һумдан ашыу аҡса ҡаралған. Эшҡыуарҙарҙың һәм үҙмәшғүлдәрҙең үҫешен дәртләндереү өсөн профилле төбәк институттары эшләй. Быйыл улар 192 бәләкәй һәм урта бизнес вәкиленә, шулай уҡ үҙмәшғүлдәргә ярҙам күрһәтте. Финанс ярҙамының дөйөм күләме 648 миллион һумдан ашҡан, – тип аңлатты Премьер-министр.
Ул шулай уҡ хөкүмәт ойошмаларының йәмғиәт һәм бизнес менән һөҙөмтәле хеҙмәттәшлек итеү ҡоралдары бөтә ерҙә лә хупланырға тейешлеген һыҙыҡ өҫтөнә алды. Республикала, бөтә илдәге кеүек үк, бындай ойошмалар һанының артыуы йәһәтенән ыңғай динамика күҙәтелә. Уҙған йыл йомғаҡтары буйынса улар 5684 ине, был 2021 йылға ҡарағанда 4,5 процентҡа күберәк.
Федераль кимәлдә Президент гранттары фонды аша Башҡортостандың коммерцияға ҡарамаған ойошмаларының проекттарына ярҙам итеү өсөн бүленгән сумма былтыр 204 миллион һумдан ашҡан. Граждандар йәмғиәтенә булышлыҡ итеү фонды аша тағы ла 261 миллион һум йүнәлтеләсәк.
- Бөгөн Евразия халыҡтары Ассамблеяһы донъяның 50-нән ашыу ил вәкилдәрен берләштерә, Рәсәй төбәктәрендә, шулай уҡ Мысырҙа, Иорданияла, Көньяҡ Осетияла 11 филиалы бар. Беҙҙең вәкиллек тә үҙенең эшмәкәрлек темптарын арттыра. Уҙған йылда уның составына ингән кешеләр һаны ике тапҡырға тиерлек – 48 кешегә тиклем артҡан. 4 яңы комитет булдырылды, - тип аңлатты Андрей Назаров.