Өс әһәмиәтле инвестиция проекты бойомға ашырыла

2024 йылдың тәүге ярты йыллығында Нефтекамала «НЕФАЗ» предприятиеһының тейәп оҙатылған продукция һәм хеҙмәттәр күләме 20,3 миллиард һум тәшкил иткән, үҫеш темпы — 35 процент. Завод «КАМАЗ» йәмғиәте предприятиелары төркөмөнә ҡарай, Рәсәйҙә КАМАЗ шассиҙарында махсус өҫкө ҡоролмалар етештереү буйынса иң ҙур предприятие булып иҫәпләнә.

Эшмәкәрлегенең төп йүнәлештәре — пассажир һәм вахта автобустары, троллейбустар, электробустар, прицептар һәм ярым прицептар, запас частар етештереү.

Предприятиела быйыл өс инвестиция проекты тормошҡа ашырыла. Был 2,25 миллиард һумлыҡ инвестициялар күләме менән КАМАЗ-дың яңы моделдәре өсөн самосвал ҡулайламаларын сығарыу буйынса производство ҡеүәтен булдырыу, автобус етештереү ҡеүәтен йылына 3 мең берәмеккә тиклем арттырыу (инвестиция күләме — 3,4 миллиард һум).  Проекттарҙа производствоның технологик процестарын автоматлаштырыу һәм роботлаштырыу, шулай уҡ ҡорамалдарҙы модернизациялау ҡаралған.

«НЕФАЗ» пассажир транспортын тикшереү өсөн майҙансыҡ, троллейбустарҙы һынау өсөн контакт селтәре төҙөй, инвестициялар күләме — 224,8 миллион һум. Предприятиеның генераль директоры Евгений Корепанов билдәләүенсә, 2024 йылдың ғинуар–июнь айҙарында инвестициялар күләме 313,8 миллион һум тәшкил иткән.

2024 йылда «НЕФАЗ» йәмғиәтенең бизнес-планы 2,3 мең берәмек пассажир техникаһы (автобустар, электр транспорты), 7,1 меңдән ашыу берәмек махсус өҫкө ҡоролма (самосвал ҡулайламалары, вахта автомобилдәре) һәм 1,8 мең берәмек тағылмалы техника сығарыуҙы күҙ уңында тота.

https://www.bashinform.ru/news/economy/2024-07-17/bashkirskoe-pao-nefaz-planiruet-vypustit-za-god-bolee-11-tysyach-edinits-tehniki-3851940