«Ирәндек» туристик кластеры буласаҡ

Башҡортостандың эшҡыуарлыҡ һәм туризм министры  Зөһрә Гордиенко әйтеүенсә, төп маҡсаты — атлы туризмды үҫтереүгә булышлыҡ итеү булған кластер Баймаҡ һәм Әбйәлил райондарын берләштерергә тейеш.

— «Ирәндек» туристик кластерын булдырыу хаҡында дүрт сәғәткә яҡын фекер алыштыҡ һәм туризм менән шөғөлләнгәндәрҙән ҙур хуплау алдыҡ. Халыҡ теләктәрен, борсолоуҙарын белдерҙе, ниндәй ярҙам кәрәклеген әйтте, — тип белдерҙе Башҡортостандың эшҡыуарлыҡ һәм туризм министры Зөһрә Гордиенко. — Фестиваль өсөнсө тапҡыр уҙғарыла, һәм бөгөн беҙ һыбайлыларыбыҙҙың һәм туристик операторҙарҙың берләшеүен күрәбеҙ. Был сара йыл буйына ваҡиғаға әйләнһен һәм һыбай йөрөргә, аттарҙы яратҡан һәр кем милли мәҙәниәт менән танышырға теләй — Рәсәй Федерацияһы картаһында ошондай нөктә барлыҡҡа килде, һәм был бик шәп!

— Иң мөһиме — унда аттар, матур Ирәндек һырты, шифалы ҡымыҙ бар. Былар ат туризмын үҫтереү өсөн яҡшы тәүшарттар. Башҡорт аты сыҙамлы, ул ҡышҡы һыуыҡтарҙа тибендә үҙенә аҙыҡ табып йөрөргә мөмкин. Биләмәлә бик күп заманса яҡшы туристик үҙәктәр барлыҡҡа килергә тейеш. Туристик маршруттарҙы үҫтереүгә туризм өлкәһендә хөкүмәт гранттарын алған эшҡыуарҙар бар ҙа инде», — тип билдәләне БР туристик биләмәләрҙе үҫтереү буйынса проект офисы етәксеһе Заһир Ҡотлосурин.

Әйткәндәй, фекер алышыуҙарҙа туризм өлкәһен үҫтереүгә дәүләт ярҙамы алған, бөгөн был тәңгәлдә үҫеш юлында булған яҡташыбыҙ Айтуған Фәттәхов үҙ тәжрибәһе менән уртаҡлашты, пландары менән бүлеште.

«Ирәндек» туристик кластерын булдырыу "Туризм һәм ҡунаҡсыллыҡ индустрияһын үҫтереү" милли проекты үтәлешенә лә булышлыҡ итә.