Ипотека микрокредит компаниялары асыла

Финанс баҙарында яңы ҡатнашыусылар — ипотека микрокредит компаниялары барлыҡҡа киләсәк, тип хәбәр иттеләр Рәсәй Банкының матбуғат хеҙмәтенән. Улар төбәктәрҙә торлаҡ алыу мөмкинлеген киңәйтеү буйынса дәүләт программаларын тормошҡа ашырыу өсөн булдырыла.

Ипотека микрокредит компаниялары Рәсәй субъекттары милкендә буласаҡ. Бер төбәктә – бер ипотека МКК-һы. Уларҙы Үҙәк банк контролдә тота.

Ипотека микрокредит компаниялары 22 октябрҙән эшләй башлай. Улар өсөн кредиттың тулы хаҡын сикләүгә мораторий ғәмәлдә булған яраҡлашыу осоро билдәләнгән. Мораторий 2026 йылдың 31 мартына тиклем ғәмәлдә ҡала.

Ипотека МКР-ры – ипотека кредиттары менән эшләү рөхсәт ителгән микрофинанс ойошмалары. Уларҙың заёмсыларға талаптары ябайыраҡ, әммә улар ипотеканы юғарыраҡ процент менән бирә.

Ипотека микрокредит компаниялары барлыҡҡа килеүе күптәргә торлаҡ мәсьәләлрен хәл итерүҙә ярҙам итәсәк, шуның менән “Дмеография” милли проекты үтәлешенә булышлыҡ итәсәк.