+29 °С
Ясна
Антитеррор
Бөтә яңылыҡтар
Көнүҙәк
16 Август 2019, 11:47

Берәү һаман асфальт көтә, икенселәр сүп-сар сығарылмауға зарлана...

Социаль селтәрҙәрҙә халыҡ мөрәжәғәттәре менән эшләүсе «Инцидент» проекты көнүҙәклеген юғалтмай.

Социаль селтәрҙәрҙә халыҡ мөрәжәғәттәре менән эшләүсе «Инцидент» проекты көнүҙәклеген юғалтмай. Кешеләр бында муниципаль берәмек етәкселәренә, йәки туранан-тура республика Башлығына мөрәжәғәт итә алыуҙы уңайлы һанай. Әбйәлилдәр ҙә әүҙемлек күрһәтеп, төрлө тармаҡтағы мәсьәләләрҙе хәл итеүҙе һорай, үҙҙәренең уй-фекерҙәре менән дә уртаҡлаша. Һуңғы бер нисә көнүҙәк мөрәжәғәткә байҡау яһап үтмәксебеҙ.

«Эко-Сити» төбәк операторы иртә яҙҙан башлап ауылдарҙа, район үҙәгендә сүп-сар сығарыу эшен алып барһа ла, уның эшмәкәрлегенә зарланыусылар кәмемәй әле. «Сүп-сарҙы тоҡтарға тултырып, әйтелгән ваҡытҡа ҡапҡа алдына ҡуйып китәбеҙ, әммә уны график буйынса йыймайҙар, һөҙөмтәлә йә эттәр, йә һыйырҙар туҙҙыра», «Ҡайҙа вәғәҙә ителгән контейнерҙар?», «Ни өсөн контейнерҙар балаларҙың уйын майҙансығына терәтеп ҡуйыла?», «Дәүләттә ҡый сығарылмай, ә халыҡтан аҡса йыялар», «Асҡарҙағы ҡаты көнкүреш ҡалдыҡтары полигонына яҡын барырлыҡ түгел, ауылдарҙан килтерелгән ҡый шунда тулды, осоп, туҙып ята, эт-ҡомаҡтар баҫты. Был бысраҡлыҡ күпме дауам итер? Ни өсөн сүп-сарҙы сортировкалауҙы ойоштормайҙар?» — тип яҙа әбйәлилдәр. Ысынлап та, был реформа күп һорауҙар тыуҙыра. Халыҡ айлыҡ түләмдәрҙе индерәбеҙ, әммә сүп-сар алынмай, тип тә зарлана. Кемдер килешеү төҙөмәгән, уға әле үк ҙур штрафтар менән янайҙар...Урындағы биләмә хакимиәте үҙенә тәғәйен эште башҡара, яңы контейнерҙар алыу дауам итә, ә ҡалған һорауҙарға төбәк операторы яуап бирергә бурыслы. Шуның өсөн «Инцидент»ҡа мөрәжәғәт итеүселәргә «Эко-Сити»ның «ҡыҙыу линия»һы һандары бирелә. Тик унда шылтыратыусылар ҙа күпселек осраҡта яуапһыҙ ҡала.

Хәлил — Әлмөхәмәт — Сибай, Асҡар — Байым трассаларында ҡасан да булһа асфальт буласағына өмөт итә райондаштар. Был хаҡта яҙыуҙар аҙна һайын тиерлек. «Район етәкселегенә килгән һәр кем Байымға тиклем асфальт буласаҡ тип вәғәҙә итә лә, бер нисә йылдан онота. Беҙҙең һорауҙы ишетһәгеҙ ине», — тип мөрәжәғәт итәләр Ташбулаттан.

«Ташбулат станцияһынан Байым ауылына хәтлем асфальт түшәү БР Юл хужалығы идаралығы планына алынған. Әле конкурс процедуралары бара. Шунан һуң дәүләт контракты төҙөләсәк һәм ремонт эштәре башланасаҡ», — тип яуаплай район башлығы И. Нафиҡов.

Илдар Таһир улы әлмөхәмәттәрҙең һорауын да яуапһыҙ ҡалдырмай: «Был трасса ныҡ кәрәкле һәм көтөлгән икәнлеген беҙ аңлайбыҙ, 18,2 километрлыҡ арауыҡҡа проект та бар, — ти ул. — Әммә Асҡар — Әлмөхәмәт — Сибай трассаһы БР Юл хужалығы идаралығы балансында иҫәпләнә. Һәм улар әйтеүенсә, был проектҡа бөгөнгә финанслау ҡаралмаған. Ниндәйҙер яңылыҡ булһа, мотлаҡ хәбәр итербеҙ».

Йәнгел ауылында үҙәкләштерелгән канализация булмауы йонсота. Бындай мөрәжәғәттәр ҙә айына бер килеп сыға. Мәҫәлән, ике ҡатлы йорттоң икенсе ҡатында йәшәүсе ғаилә, аҫтағы күршеһе төҙөкләндереп алған үҙ аллы канализацион торбаға тоташырға теләй. Тик күршеһе быға ҡырҡа ҡаршы икән. «Ҡайҙан кәрәкле рөхсәт алырға? » — тип һорай ул. «Бөгөнгө заманда канализацияһыҙ йортта йәшәүе анһат түгел. Был мәсьәлә буйынса Йәнгел ауыл биләмәһе башлығы һәм идара итеүсе компания менән кәңәшләшелгән. Тик күршегеҙ ҡаршы икән, һеҙ, милек хоҡуғын боҙоп, бер нисек тә уның фатиры аша үҙ аллы канализацияға тоташа алмайһығыҙ, — тип яуаплайҙар район хакимиәтендә. — Һеҙгә айырым соҡор ҡаҙҙырырға йәки күп фатирлы йортта йәшәүселәр менән күмәкләп килешеп, идара итеүсе компания ярҙамында йортоғоҙ өсөн үҙәк канализация системаһын монтажларға мөмкин».

Йәшел үләнле газондарға автомобилен мендереп ҡуйырға яратыусыларға штраф ҡаралыуы тураһында закон үҙ көсөнә ингәндән һуң, бындай осраҡтарҙы фотоға төшөрөп ебәреүселәр ҙә йышайған. Айырыуса Асҡар автоһәүәҫкәрҙәре газондарҙы тәләфләй икән. Фотофакттарҙы район административ комиссияһы тикшерә һәм машина хужаларына 1 – 2 мең һум, вазифауи кешеләргә 5 – 10 мең һум, юридик берәмектәргә 20-нән 30 мең һумға тиклем штраф һалыу тураһында ҡарар сығара. Икенсе тапҡыр законды боҙған өсөн штраф күләме икеләтә артыҡ буласаҡ. Тик фото йәки видеоматериалда машина ултырған газондың адресы, мөрәжәғәт итеүсенең исем-шәрифе, адресы йәки электрон йәшниге, автомобиль маркаһы, номеры хаҡында мәғлүмәт булырға тейеш. Мөрәжәғәттәрҙе [email protected] адресына ебәрергә мөмкин.

Р. МӘСӘЛИМОВА әҙерләне.

Читайте нас: