Яңы закон аҡса күсереү буйынса операторҙарҙы - банктарҙы, түләү системаларын шикле транзакцияларҙы тикшерергә һәм хатта клиенттың ризалығы булһа ла, физик берәмектәрҙең иҫәптәре араһында мутлашыу операцияларын туҡтатырға бурыслы.
«Һүҙ мутлашыусыларҙың аҡса күсертеүгә ризалыҡ алыу осраҡтары хаҡында бара, - тине Дәүләт Думаһы рәйесе Вячеслав Володин. - Айырыуса өлкән йәштәгеләр яҡлауға мохтаж. Алданған граждандар енәйәтселәргә һуңғы аҡсаһына тиклем бирә: мөлкәтен һата, кредит ала. Быға юл ҡуймаҫҡа кәрәк».
Закон ҡабул ителгәндән һуң банктар һәм башҡа операторҙар шикле тойолған аҡса күсереүҙәрҙе ныҡлы тикшерергә генә түгел, ә граждандарҙың аҡсалары мутлашыусыларға эләкмәһен өсөн саралар күрергә тейеш. Ә быға әһәмиәт бирмәгән банктарға урланған аҡсаларын кешеләргә кире ҡайтарырға тура киләсәк.