Башҡортостанда файҙалы ҡаҙылмалар сығарыуға контроль һөҙөмтәлелеге арттырыласаҡ

“Ведомство-ара комиссия составына федераль һәм республика власы, урындағы үҙидара органдары, “Роснедра”, контроль -көйләү органдары һәм йәмәғәт ойошмалары вәкилдәре инде. Был әһәмиәтле мәсьәләләрҙе хәл итеү өсөн төрлө структураларҙың тырышлығын берләштереү мөмкинлеген бирҙе. Комиссия ултырыштары барышында ер аҫтын файҙаланыусылар тарафынан ер аҫтын файҙаланыуға лицензиялар шарттарын үтәү, һибелмә алтын сығарыуға лицензия биреүгә мораторий, бөткән карьерҙарҙы рекультивациялау, карьерҙарҙы һаҡлау, ер аҫтын үҙләштереү буйынса техник проекттарҙы раҫлау мәсьәләләре ҡаралды. Учалы биҫтәһендәге алтынлы биләмәләрҙә эшләгән ер аҫты файҙаланыусыларының проекттары анализланды, шулай уҡ файҙалы ҡаҙылмалар сығарыу һалымынан килгән килемдәр баһаланды. Законһыҙ ҡаҙылма байлыҡтар сығарыу буйынса ҡайһы бер осраҡтарға айырым иғтибар бирелде. Шулай итеп, Урал аръяғында ҡырағай рәүештә тау эштәре алып барған алтын сығарыусыларға ҡарата енәйәт эше ҡуҙғатыла, лицензиялар ғәмәлдән сығарыла, ҡағиҙә боҙоусыларға суд ҡарары менән тирә-яҡ мөхиткә килтерелгән зыянды ҡапларға ҡушыла. Дөйөм файҙалы ҡаҙылмаларҙы законһыҙ сығарыуға ҡаршы көрәш көсәйҙе. Бының өсөн Башҡортостанда уларҙың әйләнешен һәм һатыуҙы һанлы иҫәпкә алыу системаһы индерелгән. Был файҙалы ҡаҙылмалар сығарыуҙан һалым килемдәренең һиҙелерлек артыуына килтерҙе. Дөйөм алғанда, республика ер аҫтын файҙаланыуҙың үтә күренмәле схемаһын төҙөүгә өлгәште, — тип комментарий бирҙе Нияз Фазылов.

Ер аҫтын эшкәртергә лицензиялар биреүгә бәйле кире хәлдәр барлыҡҡа килмәһен өсөн, киләсәктә беҙ Роснедра менән бәйләнешкә инергә планлаштырабыҙ, ер аҫтын файҙаланыу өсөн лицензиялар биреүҙе республика хөкүмәте менән көйләүҙе күҙ уңында тотоу тәҡдиме һәм геологик разведкалар үткәреү ваҡытын оҙайтыу өсөн  Урал аръяғы майҙансығы  2032  йылдың IV кварталына тиклем федераль бюджет иҫәбенә индереүҙе тәҡдим итәсәкбеҙ. Шулай итеп, республика тәбиғәт ресурстары менән идара итеү процесында асыҡлыҡ һәм һөҙөмтәлелек тәьмин итергә ынтыла”.

Сығанаҡ һәм фото: “Башинформ”