+24 °С
Ясно
Мәғариф
9 Ноября 2021, 09:10
БашҡортСофт: башҡорт телен һаҡлау буйынса проектты алып барыусы Наил Юнысовтың тауышы менән һөйләй
Башҡорт телен һаҡлау һәм үҫтереү фонды Bashkortsoft проектын башлап ебәрҙе. Ул тотош һөйләмдәрҙе башҡорт теленән руссаға, руссанан башҡортсаға тәржемәләй. Проект танылған алып барыусы Наил Юнысовтың тауышы менән һөйләй.
«Проект башҡорт телендәге текстар, тәржемәләр менән эшләгәндәрҙең барыһы өсөн лә файҙалы. Онлайн-тәржемәсе ҙур текстарҙы тәржемәләй, һүҙлек, текстарҙы уҡыу бүлеге бар. Руссанан башҡортсаға, башҡортсанан руссаға онлайн-тәржемәселәр булмағас, әҙерләй башланыҡ. Хәҙерге ваҡытта онлайн-тәржемәсе һынау режимында эшләй, асыҡланған хаталарҙы төҙәтәбеҙ. Әлегә тәржемәсенең сифаты яҡынса 70 процент тәшкил итә. Параллель текстар ни тиклем күберәк, тәржемәсе лә сифатлыраҡ була», — тине фонд етәксеһе Гөлназ Йосопова.
2020 йылда тупланған параллель мәғлүмәттәр нигеҙендә һигеҙ нейроселтәрҙән торған ансамблде көйләү башҡарылған. Башҡорт һәм рус телдәрендәге бер төрлө материалдарҙы туплау, эшкәртеү дауам итә. Йәмғеһе 14 меңдән ашыу интернет бит эшкәртелгән.
«Наил Юнысов тауышы менән башҡорт телендәге теләһә ниндәй тексты яңғыратырға һәләтле компьютер программаһы Башҡорт телен һаҡлау һәм үҫтереү фонды булышлығында булдырылды. Синтезаторҙы bashkortsoft.ru рус-башҡорт тәржемәсеһе сайтында һынап ҡарарға мөмкин. Сайтҡа инеүселәрҙең текстың башҡорт телендәге тәржемәһе нисек яңғырауын тыңлау мөмкинлеге бар», — ти сайтты төҙөүселәрҙең береһе Айҙар Хөсәйенов.
Башҡорт телен һаҡлау һәм үҫтереү фонды был проектты тормошҡа ашырыуҙың Башҡортостанда мәғлүмәти технологияларҙы, республиканың дәүләт телдәрен үҫтереүгә булышлыҡ итәсәгенә ышана.
