«Курчатов кластары»

1 сентябрҙән Рәми Ғарипов исемендәге республика гимназия-интернатында һәм республика инженер лицей-интернатында «Курчатов кластары» асыласаҡ, был хаҡта Башҡортостан Башлығы Радий Хәбиров социаль селтәрҙәге сәхифәһендә хәбәр итте.

Был хаҡта «Курчатов институты» милли тикшеренеү үҙәге менән уртаҡ проект, уны тормошҡа ашырыу тураһында милли тикшеренеү үҙәге президенты Михаил Валентинович Ковальчук менән осрашыуҙа һөйләшеп килешелгән. «Курчатов кластары»нда балалар етенсе кластан башлап, тәбиғи-ғилми фәндәрҙе тәрәнерәк өйрәнә, тикшеренеү эшмәкәрлеге менән шөғөлләнә. Рәсәйҙең 12 төбәгендәге 82 мәктәптә ошондай кластар бар. Проект сиктәрендә уҡыусыларға заманса ҡорамалдарҙа һәм лабораторияларҙа эшләү мөмкинлеге бирелә, ә методик ярҙамды «Аврора» үҙәге күрһәтә.

Бындай проект “Мәғариф” милли проектын үтәүгә лә үҙ өлөшөн индерәсәк.