Ҡазандан гран-при менән

Татарстанда бер юлы өсләтә байрамға барып төшә яҡташтарыбыҙ. Рәсәй кимәлендәге ҙур сара республика һәм ҡала көнөнә лә тура килә. Фестивалдә илдең 26 төбәгенән 40-тан ашыу тел вәкиле ҡатнаша. «Ҡазан» ғаилә үҙәге янындағы әҙәби сатырҙарҙа милли телдәрҙә яҙыусы авторҙар үҙҙәренең ижад күргәҙмәләрен тәҡдим итә, мастер-кластар, интерактив уйындар, лекциялар ойоштора. Ижад ҡаҙаны ҡайнап торған майҙандағы ике сәхнәлә шулай уҡ төрлө милләт халыҡтарының сығыштарынан үрелгән концерттар гөрләй. «Миләш» халыҡ фольклор ансамбленә байрамдың хөрмәтле ҡунаҡтарын — Татарстан Республикаһы Президенты Рөстәм Миңнеханов етәкселегендәге делегацияны ҡаршы алыу мәртәбәһе тейә. Төп сәхнәләге тамашаны асыу ҙа «Миләш»тәр өлөшөнә яҙа. Яҡташтарыбыҙ татар, урыҫ, дағ, ҡалмыҡ, яҡут, сиған халыҡ ансамблдәре араһында лайыҡлы сығыш яһай. Миңлегөл Солтанбаева ҡыл-ҡумыҙҙа башҡорт халыҡ йыры «Элмәлек»те уйнай, сәләмләү һүҙен тел оҫтаһы, сәсәниә Мәүҙиға Баймөхмәтова әйтә. Ғәлиә Фәттәхова халҡыбыҙҙың ауыҙ-тел ижады өлгөләре аша бай, тәрән аҡыллы, яғымлы телебеҙ менән таныштыра. Сағыу кейемдәре, дәртле таҡмаҡтары, ойотоп баҫып бейеүҙәре менән тамашасы күңелен яулаған Башҡортостан ҡунаҡтарын йылы алҡыштар менән оҙаталар. Тере башҡорт сувенирҙары менән байрам майҙанында фотоға төшөргә теләүселәр ҙә күп була.

— Сығыш яһағандан һуң иркен тын алып, байрамға тамаша ҡылып йөрөгәндә яныбыҙға бер егет килеп: «Апайҙар, «Ҡазан һөлгөһө» конкурсында ҡатнашырға теләмәйһегеҙме?» — тип Татарстан Республикаһы һәм ҡала көнө сиктәрендә барған икенсе ҙур Халыҡ-ара фестивалгә саҡырҙы. Татарстандың атҡаҙанған мәҙәниәт хеҙмәткәре, «Залесный» мәҙәниәт үҙәге директоры Тимур Йосопов булып сыҡты ул. Беҙ үҙ-ара тиҙ генә кәңәшләшеп, ятып ҡалғансы, атып ҡалырға булып, ризалаштыҡ та ҡуйҙыҡ, — тип һөйләй Миңлегөл Бәхтинур ҡыҙы.

Райондың һәр мәҙәни сараһының үҙәгендә йөрөгән «Миләш»тәрҙең ижади багажы бик бай. Репертуарҙарынан фестиваль-конкурсҡа тап килгәндәйен һайлап алып, Иҫке Татар биҫтәһендә Ғ. Камал театры һәм Әл-Мәржәни мәсете араһындағы майҙанға барып төшәләр. Татарстандың халыҡ артистарынан, сәнғәт белгестәренән торған жюри «Миләш» ансамбленең сығышын юғары баһалай, коллектив гала-концертта ҡатнашыу хоҡуғына лайыҡ була. Конкурсҡа йомғаҡ яһала. Яҡташтарыбыҙ фестивалдең иң юғары наградаһы — гран-прины ала һәм еңеүсе булараҡ, йәнә сәхнәгә сығып, фестивалде ябып ҡуя.

— Уйламағанда бәйгелә ҡатнашып, унда еңеү яулауыбыҙ өсөн сикһеҙ шатбыҙ. Дипломдар, иҫтәлекле бүләктәр алып ҡайттыҡ. Ғөмүмән, Ҡазан ҡалаһы күңелдәрҙә фәҡәт яҡты хәтирәләр генә ҡалдырҙы. Рухыбыҙ үҫте, күңелебеҙ байыны, тағы ла дәртләнеберәк ижад итергә илһамландыҡ. Татар ҡәрҙәштәребеҙ беҙҙе бик йылы ҡабул итте. Ҡазандың иҫтәлекле, матур урындарын күреү форсаты ла тейҙе. Бер көнөбөҙ ҡала буйлап экскурсияға бағышланды, — тине М. Б. Солтанбаева сәфәр тәьҫораттары менән уртаҡлашып.

Гөлнара КҮСӘРБАЕВА.