Мәңге балҡыясаҡ йондоҙ ул...

Аяуһыҙ сир күп ҡырлы талант эйәһе, ил инәһе тигән танылыу алған яҡташыбыҙ Зөһрә Хәдит ҡыҙы Фәйзуллинаны 75-се йәшендә баҡый донъяға алып китте. Милләтебеҙ генофонды һаналған Әбйәлилдең рухи-мәҙәни тормошондағы бер ҡыл өҙөлдө. Әммә уның моңо мәңге яңғыраясаҡ. Сөнки ул ҡышҡы сасҡау һыуыҡтарҙа ла туңмаҫ саф шишмә һыуындай бик тәрәндән халҡын һөйгән күңел төпкөлөнән сыға. Бында мин мәрхүмәнең таш йөрәкте лә иретерлек шиғырҙарын һәм бигерәк тә йырҙарын күҙ уңында тотам.

Тигән юлдарҙы үҙе иманлы кеше генә яҙа ала. Ә Зөһрә Хәдит ҡыҙы тап шулай булды, күптәргә өлгө күрһәтеп, хаж ғәмәле лә ҡылды. Ә уға тиклем күп йылдар Амангилде, Красная Башкирия, Хәлил, Урал урта, Сибай интернат-мәктәптәрендә, Сибай педагогия колледжында балаларға белем бирҙе. Һәр уҡыусыһына һынсыл ҡараны, уларға оло тормош юлы һайлашты.

— Медицина өлкәһенә Зөһрә Хәдит ҡыҙының кәңәше буйынса аяҡ баҫтым һәм уға мең рәхмәтлемен, — ти Сиҙәм ҡасабаһынан халыҡ табибәһе Гөлсирә Ғәниева.

БР-ҙың атҡаҙанған уҡытыусыһы исеменә һәм хеҙмәт ветераны миҙалына лайыҡ булған яҡташыбыҙ менән ул Сибайҙың «Атайсал» гәзитенә мөхәррирлек иткән саҡта, Өфө тарафтарында семинар-кәңәшмәләргә күп тапҡыр бергә йөрөнөк. Бер сәфәребеҙҙә яҡташ һеңлеһе менән икәүләп халыҡ йырҙарын да, үҙе яҙғандарҙы ла, таҡмаҡтарҙы ла юл буйына яңғыратыуы бөгөн булһа ҡолаҡ төбөндә сыңлай. «Илекле ҡыр», «Ҡырҡты тау», «Тәгәрәп китте йөрәгем», «Өсмөйөшлө хаттар», «Арҡайым» һәм башҡа халыҡсан моңдары әллә нисә быуынды үҙҙәренә арбар әле. Ә «Мәктәп вальсы»на йыл да уҡыусылар һәм башҡалар бейергә төшөр... Ижад, хәтер һәм ҡәҙер кисәләрендә, башҡа сараларҙа яңғыраясаҡ улар.

Мәрхүмә яҡташыбыҙ тураһында бик күп һөйләргә һәм яҙырға мөмкин. Сөнки уның күп ҡырлы таланты һәм уларҙың һәр береһенә өлгәшкән уңыштары тотош китапҡа торошло. Шағирә, композитор, драматург, сценарий яҙыу оҫтаһы. Һуңғы жанрҙағы маһирлығына әбйәлилдәр үҙҙәре әллә нисә мәртәбә шаһит булды: һабантуйҙар, шәжәрә байрамдары Зөһрә Хәдит ҡыҙының сценарийҙары буйынса бик юғары кимәлдә үтте. Салауат Юлаев көндәренә, «Ирәндек моңдары»на ҡарата яҙылғандары ла ҡабатланмаҫ спектакль һымаҡ.

БР-ҙың һәм РФ-ның Журналистар, БР-ҙың Яҙыусылар союздары ағзаһы, БР-ҙың Почет грамотаһы кавалеры, Р. Өмөтбаев (Сибай), Х. Әхмәтов (Баймаҡ районы), К. Әхмәтйәнов (Әбйәлил районы) премиялары, «Гәлсәр һандуғас» телевизион конкурс лауреаты исемдәренә лайыҡ яҡташыбыҙ рухи донъябыҙҙа мәңге балҡыр Зөһрә йондоҙ булып ҡаласаҡ. Бәхил бул, апай! Кешеләргә ҡылған изгелектәрен баҡый донъяла үҙеңә әжер-сауаптар, йәнең йәннәттә булһын!

Хәтеремдә әле, бала саҡта,

Һеңлеләрен йыйып ҡунаҡҡа,

Тол инәйем төштәр һөйләр ине,

Юрай-юрай янған усаҡҡа:

«Еҙнәгеҙҙе төштә күрҙем:

Ҡулдарында — пар алма.

Береһен алдым, икенсеһе

Төшөп китте даръяға.

Бер күрергә зар булып,

Йөрөй икән ҡайҙарҙа?!

Әллә ҡайтып төшөрмө

Яҙғы ташҡын айҙарҙа?..»

Йылдар үтте, бойоҡ һеңлеләргә

Шаян ҡыҙҙар үҫте алмашҡа.

Ә инәйем һаман төштәр һөйләй,

Йыйып алып беҙҙе аулаҡҡа:

«Төштә апаң бесән саба,

Бакуй ҡала ярылып.

Күҙ күреме ергә еткәс,

Ҡул болғаны ҡайырылып.

Салғым һелтәп, мин дә төштөм,

Ҡыумаҡ булып артынан.

Инде-инде еттем, тигәс,

Салғым һынды уртанан...»

Ейәнсәрҙәр инде буй еткерҙе,

Улар өсөн тарих үткәндәр.

Сәйерһенеп тыңлай өләсәләрен,

Ғүмер йомғаҡтарын һүткәндә.

«Олатағыҙ төшкә инде,

Алып ҡайтҡан күн итек.

Кейәйем тип ҡулыма алдым,

Ни күрәм — береһе һүтек.

Әй ғүмерҙәр! Һынай-һынай

Аҡты ла китте үтеп.

Йыр һәм өмөт юлдаш булды,

Тик күңел ҡалды китек.

Яңғыҙлыҡтан тамам биҙеп,

Төшкән саҡта бөшөлөп,

Яугир рухы ҡеүәт бирҙе

Төштәремә гел инеп.

Дөрләп янған йөрәгемдең

Уты бара һүрелеп.

Йән һөйгәндәрҙе һаҡлағыҙ

Күҙ ҡараһылай күреп...»

Күптән инде үҙем ир ҡатыны,

Аҙмы-күпме һағыш татыған.

Шуғалыр ҙа ярһыу яҙҙыр етһә

Яндарыңа инәй, ашығам.

Әүәлгеләй, хәтер төштәреңде

Юрай-юрай, инәй, һөйлә һин.

Һүнгәндә лә ғүмер усаҡтары,

Хәтер усаҡтары һүнмәһен.

Ал кәрешкә, күк ҡыңғырау,

Сәскә ата яланың.

Тауҙарыңда сейә бешә,

Һаҙҙарыңда — баланың.

Илекле ҡыр, илекле ҡыр,

Еркәйемдә балҡый бер нур,

Илекле ҡыр, илекле ҡыр,

Йөрәгемдә сыңлар бер йыр.

Хайран ҡалып торғаным бар,

Илектәр уйнағанда.

Ҡайынлығың шымып тыңлай,

Кәкүктәр моңланғанда.

Бесән етһә, шул моңдарға

Салғы сыңы моң өҫтәй.

Ҡайҙа ғына йөрөһәм дә,

Тыуған яҡ китмәй иҫтән.

Бөркөттәрем ҡаяларҙа

Ҡанаттарын ҡағына.

Бөркөт ишле кешеләрем

Илекле ҡыр яғында.

Зөһрә Фәйзуллина.