Башҡортостанда берҙәм республика нур диагностикаһы үҙәге асыласаҡ

Башҡортостанда Ҡыуатов исемендәге Республика клиник дауаханаһында берҙәм республика нур диагностикаһы үҙәге асыласаҡ. Был хаҡта Хөкүмәттең оператив кәңәшмәһендә һаулыҡ һаҡлау министры Айрат Рәхмәтуллин белдерҙе.

Уның һүҙҙәренсә, МРТ, КТ, рентгенография, маммография, флюорография һөҙөмтәләре берҙәм базаға тупланасаҡ. Уларҙы тикшереү менән үҙәк белгестәре шөғөлләнәсәк. Был процесты оптималләштерергә һәм берҙәм республика һанлы тикшеренеүҙәр архивы булдырырға ярҙам итәсәк.

Хәҙер пилот проект булараҡ система Нефтекама ҡалаһы дауаханаһында һәм Өфөнөң 46-сы поликлиникаһында тикшерелә.

«Пациент, әйтәйек, Белоретта икән, ә уның анализдарын Өфөлә ҡараясаҡтар. Был аҙ сығымлы. Иң мөһиме, беҙ медицина оҫталарын бер урынға туплайбыҙ. Сөнки бында пациентта ҡарарға кәрәкмәй, ә белгестәргә КТ, МРТ мәғлүмәттәрен асыҡларға ғына кәрәк», - тине Радий Хабиров.

"Йәшлек" гәзите сайтынан.