Асыҡ ишектәр көнө

Урал аръяғы агросәнәғәт колледжының Әбйәлил филиалында асыҡ ишектәр көнө үтте. Дәүләт урта мәктәбе уҡыусылары “Тракторсы-машинист”, “Иретеп йәбешетереүсе”, “Ауыл хужалығы производствоһы мастеры”, “Ашнаҡсы-кондитер” һөнәрҙәре хаҡында ҡыҙыҡлы, файөҙалы ла мәғлүмәттәр алды.

Уҡытыусылар, мастерҙар, шулай уҡ бөгөн ошонда белем алған студенттар колледжда уҡыуҙың өҫтөнлөктәре хаҡында һөйләне, оҫталыҡ дәрестәре күрһәтте, колледж уҡыусыларының уңыш-ҡаҙаныштары менән таныштырҙы.

 Сығарылыш класы уҡыусылары шулай уҡ колледжға уҡырға инеү ҡағиҙәләре менән танышты, ниндәй секция-түңәрәктәр эшләүе хаҡында хәбәрҙар булды, филиалдың кабинеттарын, мастерскойҙарын ҡараны, үҙҙәрен ҡыҙыҡһындырған төрлө һорауҙарға ентекле яуаптар ҙа алды.

Бындай осрашыуҙар “Хеҙмәт етештереүсәнлеге һәм мәшғүллек” милли проекты үтәлешенә лә үҙ өлөшөн индерә.