Башҡортостанға туристар ағымы арта

2025 йылда туристар ағымы 2,4 миллион кешенән ашып киткән, тип хәбәр иттеләр төбәк Хөкүмәте идаралығынан. Был 2024 йылғы күрһәткес менән сағыштырғанда 8,2 процентҡакүберәк.

Шулай итеп, ил кимәлендәге рейтингта республика 16-сы урындан 13-сөгә күтәрелеп, Волга буйы федераль округы төбәктәре араһында 3-сө урынға сыҡты. Ҡунаҡтарҙың күпселеге күрше төбәктәрҙән, мәҫәлән, Силәбе, Ырымбур, Свердловск өлкәләренән һәм Татарстан Республикаһынан килә.

“Туристар һанының артыуы беҙҙең дөрөҫ йүнәлештә барыуыбыҙҙы раҫлай: инфраструктураны үҫтерәбеҙ, маршруттар ассортиментын киңәйтәбеҙ, хеҙмәтләндереү сифатын яҡшыртабыҙ. Бөгөн туристар үҙ зауығына тап килгән сәйәхәтте һайлай алыуы мөһим — белем биреү экскурсияларынан алып әүҙем тау походтарына тиклем", - тип билдәләне Башҡортостандың эшҡыуарлыҡ һәм туризм министры Светлана Верещагина.

Әле төбәктә 49 туроператор 700-ҙән ашыу төрлө маршрут тәҡдим итә. Иң популяр варианттар араһында фәнни-популяр, сәнәғәт һәм иҫтәлекле урындарҙы ҡарау, шулай уҡ тау, походтар һәм йәйәү экскурсиялары бар.

Сығанаҡ: https://bashgazet.ru/articles/milli-proekttar/2026-07-21/turistar-a-ymy-8-2-protsent-a-art-an-4757948