"Демография" милли проекты күрһәткестәре үтәлмәгән

"Рәсәй Федерацияһының Хеҙмәт һәм социаль яҡлау министрлығына 2021 йылда " Демография "милли проектының өлкән йәштәге граждандарҙы һәм инвалидтарҙы социаль хеҙмәтләндереү ойошмалары күрһәткән социаль хеҙмәттәр менән тәьмин итеүгә ҡағылышлы күрһәткестәренә өлгәшмәү сәбәптәрен анализлау бурысы йөкмәтелде", - тиелә Стратегик үҫеш һәм милли проекттар буйынса совет ултырышы йомғаҡтары буйынса дәүләт башлығының йөкләмәләр исемлегендә.

Министрлыҡ килеп тыуған хәлде төҙәтеү һәм күрһәткестәргә өлгәшеү өсөн өҫтәмә сараларҙы тормошҡа ашырыуҙы тәьмин итергә тейеш. Был мәсьәлә буйынса докладты 25 ғинуарға тиклем, артабан кварталға бер тапҡыр еткерергә кәрәк. 

Стратегик үҫеш һәм милли проекттар буйынса совет ултырышы барышында Путин эшкә һәләтле йәштән өлкән граждандарҙың һәм социаль хеҙмәтләндереү ойошмаларында социаль хеҙмәттәр алған инвалидтарҙың бер аҙ кәмеүенә иғтибар йүнәлтте. Хеҙмәт министры Антон Котяков  бының ковид сикләүҙәре, шулай уҡ ҡайһы бер хеҙмәттәрҙе дистанцион форматҡа күсереү менән бәйле булыуын аңлатты. Президент был осраҡта һандар артында  аныҡ кешеләр тороуын билдәләне. Ул министрға тағы ла бер тапҡыр ошо мәсьәләгә кире ҡайтырға һәм ошо күрһәткестең кәмеүенә бәйле деталдәрҙе ентекләп тикшерергә ҡушты.