Ҡазанда саммит тамамланды

Рәсәй президенты Владимир Путин, Мысыр Президенты Абдельфаттах Сиси, Һиндостан Премьер-министры Нарендра Моди, Иран Президенты Масуд Пезешкиан, Ҡытай Халыҡ республикаһы рәйесе Си Цзиньпин, Берләшкән ғәрәп әмирлектәре Президенты Мөхәммәт бен Заид Әл Нахайян, Эфиопия Премьер-министры Абий Әхмәт, КАР Президенты Сирил Рамафоза һәм Бразилияның сит ил эштәре Министры Мауро Луис Иекер Виейра Саммит сиктәрендә ултырыш үткәрҙе.

Был осрашыу алдынан БРИКС дәүләттәре делегациялары башлыҡтары  күмәкләп фотоға төштө. Киңәйтелгән составта дауам иткән ултырышҡа видеоэлемтә буйынса  Бразилия Президенты Луис Инасио Лула да Силва ҡушылды.

 БРИКС-тың XVI саммиты йомғаҡтары буйынса Берләшмә илдәренең Ҡазан декларацияһы ҡабул ителде. Саммитта Владимир Путин бер нисә ике яҡлы осрашыу үткәрҙе. Кисен БРИКС саммитын үткәреү уңайынан Рәсәй Президенты исеменән тантаналы ҡабул итеү ойошторолдо, унда берләшмә ағзалары булған дәүләттәр башлыҡтары һәм БРИКС менән хеҙмәттәшлек итергә теләгән илдәр лидерҙары саҡырылды.