Владимир Путин Әстерхан өлкәһе губернаторы менән осрашты

Осрашыуҙа төп иғтибар комиссия эшмәкәрлегенә һәм төбәктең социаль-иҡтисади хәленә йүнәлтелде.

Игорь Бабушкин президентҡа дәүләт башлығы указы буйынса ойошторолған комиссия махсус хәрби операцияла ҡатнашыусыларға, ветерандарға һәм уларҙың ғаилә ағзаларына федераль һәм төбәк ярҙам сараларын координациялау өҫтөндә эшләй, тип хәбәр итте. Уға 44 кеше инә, шул иҫәптән губернаторҙар, хөкүмәт, президент хакимиәте һәм йәмәғәт ойошмалары вәкилдәре.

Губернатор әйтеүенсә, комиссия майҙансығында медицина-психологик ярҙам системаһын камиллаштырыу, инвалидтар өсөн торлаҡты яраҡлаштырыу һәм ветерандар араһында эшҡыуарлыҡ эшмәкәрлеген дәртләндереү буйынса тәҡдимдәр әҙерләнгән дә инде. Хөкүмәт реабилитация һәм шифахана-курорт дауалау программаһын 2027 йылға тиклем оҙайтҡан. Бабушкин шулай уҡ юридик һәм медицина процедураларын ябайлаштырыуҙы, инвалидлыҡ критерийҙарын ҡайтанан ҡарауҙы һәм хәрби комиссариатта ҡатнашыусылар өсөн уҡыу һәм эшкә урынлашыу мөмкинлектәрен киңәйтеүҙе ҡарарға тәҡдим итә. Бынан тыш, Әстерхан өлкәһе башлығы хәрбиҙәрҙең ғаиләләренә психологик ярҙам күрһәтеү өсөн тәҡдимдәр әҙерләү һәм индереү тураһында һөйләне.

Президент бындай саралар кәрәклеген хупланы һәм бөтә башланғыстарҙың ентекле эшкәртелергә һәм финанслау менән тәьмин ителергә тейешлеген һыҙыҡ өҫтөнә алды. Бынан тыш, губернатор төбәктең үҫеше тураһында хәбәр итте: өлкәлә рекордлы уңыш алына, торлаҡ төҙөлөшө темптары арта һәм коммуналь инфраструктура яңыртыла. Уның һүҙҙәренсә, төбәк иҡтисади үҫештең мөһим факторына әйләнгән «Төньяҡ – Көньяҡ» халыҡ-ара транспорт коридорын үҫтереүҙә әүҙем ҡатнаша.