Мөрәжәғәтнамә – кешеләр тураһында

Унда Хөкүмәт ағзалары, Дәүләт Йыйылышы – Ҡоролтай депутаттары, муниципалитет башлыҡтары ҡатнашты.

– Сираттан тыш видеоконференцияның сәбәбе бөтәбеҙгә лә аңлашыла: кисә Рәсәй Президенты Мөрәжәғәтнамә менән сығыш яһаны, – тине Радий Хәбиров. – Шуны билдәләгем килә: мин бик күп Мөрәжәғәтнамәләр тыңланым, улар төрлө мәсьәләләргә ҡағыла ине – тышҡы сәйәсәт тә, дәүләт ҡоролошо ла. Ә быныһы, күп эксперттар белдереүенсә, кешеләр тураһында. Беҙҙең граждандар өсөн бик күп файҙалы саралар тәҡдим ителде.

Радий Хәбиров сығыштың тексын ҡарап сығырға, айырым ҡарарҙарына баҫым яһарға һәм уны тормошҡа ашыра башларға саҡырҙы.

– Мөрәжәғәтнамәлә беҙ үҙаллы ҡабул итәсәк ҡарарҙар ҙа бар. Мәҫәлән, башланғыс кластарҙа бушлай ашатыуҙы ойоштороу сроктары буйынса. Ғөмүмән, иғтибар иткәнһегеҙҙер, Мөрәжәғәтнамәнең төп тезисы "беҙҙең илдең бөйөклөгө – уның граждандарының лайыҡлы йәшәү кимәлендә" ине. Төп мәғәнә ошонда, – тине төбәк етәксеһе.

Радий Фәрит улы Мөрәжәғәтнамәне блоктар буйынса ҡарап сыҡты. Беҙҙең республикаға бәйлеләренә айырым иғтибар бүленде.

Фото: glavarb.ru