Радий Хәбиров «Берҙәм Рәсәй»ҙең төбәк бүлексәһе алдында торған төп бурыстарҙы атаны. Шул рәүешле төбәк етәксеһе 2023-2024 йылдарҙағы һайлау циклына старт бирҙе.
- 2022 йылда республикала урындағы үҙидаралыҡ органдарына өҫтәмә һайлауҙар үтте. 156 алмаштырыласаҡ мандаттың 137-һе - «Берҙәм Рәсәй»ҙән депутаттар булыуы ҡыуаныслы. Коллегаларымды был яҡшы һөҙөмтә менән ҡотлайым, - тине Радий Хәбиров. - Киләһе йыл да бик мөһим булмаҡсы. 2023 йылда Башҡортостан Республикаһы - Дәүләт Йыйылышы Ҡоролтайға һайлау уҙғарыла. Уның депутаттары әлеге ваҡытта бик әүҙем һәм һөҙөмтәле эшләй. Парламентыбыҙҙың яңыртылған составы ла шундай уҡ көслө булыр тип ышанам. Бынан тыш, беҙ ауыл советтарына 8 мең депутат һайлаясаҡбыҙ. Ә 2024 йылда Рәсәй Президентын һәм Башҡортостан Башлығын һайлауҙар була. Был - етди бурыс. Был ваҡиғаларға әҙерлеккә һәм уны үткәреүгә мөмкин тиклем яуаплы ҡарарға кәрәк.