Төрлө кимәлдәге ярыштар дауам итә

Ишбулды мәктәбе тренеры Рәйес Әбделғазин етәкселегендәге үҫмерҙәр командаһы ошо көндәрҙә Баймаҡ ҡалаһында үткән Милли көрәш буйынса асыҡ беренселектә ҡатнашты. Биш райондан килгән тиҫтерҙәре араһында бил һынап, үҙҙәренең ауырлыҡ төркөмдәрендә Рөстәм Хәйбуллин һәм Тимур Талипов чемпион исеменә лайыҡ булды, ә Вилдан Питилимов өсөнсө урынды яуланы. Уҙған йома иһә көрәшселәр район турнирында көс һынашты. Был ярышта еңеүселәр февраль айында Бөрйән һәм Ҡырмыҫҡалы райондарында ойоштороласаҡ милли көрәш буйынса төбәк һәм республика ярыштарында Әбйәлил намыҫын яҡларға бара.

* * *

«Батыр» физкультура-һауыҡтырыу комплексында һәм Таһир Кусимов исемендәге гимназияла Уҡыусыларҙың XX спартакиадаһы иҫәбенә волейбол буйынса ярыштарҙың финалы үтте. Үҫмерҙәр араһында финалға сыҡҡан биш команданың дүртәүһе — Дәүләт, Хәмит, Салауат һәм 1-се Асҡар урта мәктәбе командалары килде. Хәмит мәктәбе спортсыларының алыҫ юлды яҡын итеп, көндөң хәтәр һыуыҡ булыуына ҡарамай килеүе бушҡа булманы: улар тәүге осрашыуҙарҙа уҡ яҡшы уйын күрһәтте, һөжүм итеүселәр ҙә, һаҡсылар ҙа тренерының һәр һүҙен тыңлап, дөрөҫ эш итте. Һөҙөмтә лә улар файҙаһына булды: иң күп мәрәйҙәр һаны йыйып, хәмиттәр беренсе урынды яуланы.

Ҡыҙҙар араһында иһә Таһир Кусимов исемендәге гимназия спортсылары алдынғылыҡты ҡулдан ысҡындырманы.