Республика беренселеге юғары кимәлдә үтте

«Батыр» физкультура-һауыҡтырыу комплексында Башҡортостан Республикаһы Мәғариф министрлығының волейбол буйынса беренселеге уҙҙы. Мәртәбәле ярышты Әбйәлилдә ҡабул итеүгә балалар-үҫмерҙәр спорт мәктәбе етәкселеге һәм хеҙмәткәрҙәре етди әҙерләнде: спортсылар бер көн алдан «Ирәндек» балалар лагеры базаһына килеп урынлашты, ә уйындар дүрт көн дауамында «Батыр»ҙа һәм Таһир Кусимов исемендәге гимназияла барҙы.

Сараны асыу тантанаһында район хакимиәте башлығының социаль мәсьәләләр буйынса урынбаҫары Раян Фәттәхов, хәрби комиссар Рөстәм Ғәҙелшин, физик культура, спорт һәм туризм буйынса район комитеты рәйесе Артур Дәүләтбаев, ДЮСШ директоры Ласын Усманов һәм башҡалар ҡатнашты. Спортсыларҙы Уҡыусыларға физик тәрбиә биреү һәм олимпия резервын әҙерләү буйынса республика идаралығы начальнигы вазифаһын башҡарыусы, милли көрәш буйынса Европа, Рәсәй һәм республика чемпионы Марсель Йосопов тәбрикләне. Тантаналы өлөш Лилиә һәм Радик Хәлиловтар етәкләгән «Сорнай» балалар бейеү ансамбленең дәртле сығышы менән тамамланды.

Төп судьялар Илмир Бүләкбаев менән Руслан Илһамов ярыш шарттары менән таныштырғандан һуң, майҙансыҡта тәүгеләрҙән булып Сибай һәм Әбйәлил волейболсылары осрашты. Район намыҫын ярышта Амангилде, Хәмит, Рәхмәт, Салауат, 1-се Асҡар урта мәктәбе һәм Таһир Кусимов исемендәге гимназия спортсыларынан торған команда яҡланы. Тренер ролен өмөтлө спортсы Илнур Мусин үтәне.

Алты команда волейболсылары (Әбйәлилдән тыш, Шишмә, Күгәрсен райондары, Баймаҡ, Сибай һәм Стәрлетамаҡ ҡалалары спортсылары килгәйне) һәр осрашыуҙа яҡшы уйын, оҫталыҡ күрһәтте. Айырыуса Стәрлетамаҡ үҫмерҙәренең берҙәмлеге күҙгә ташланды. Һәм уларҙың тырышлығы бушҡа китмәне: финалда стәрлетамаҡтар Әбйәлил йыйылма командаһы менән осрашып, лайыҡлы рәүештә еңеү яуланы. Әбйәлилдәр — икенсе, сибайҙар өсөнсө урында билдәләнде. Еңеүселәрҙе ҡотлап, ДЮСШ директоры Л. М. Усманов кубоктар һәм миҙалдар тапшырҙы. «Иң яҡшы уйынсы» номинацияһында билдәләнгән Артем Гусев, Кирилл Хәтмуллин (Стәрлетамаҡ), Илназ Юлдашев (Күгәрсен), Раян Минһажев (Әбйәлил), Богдан Баскаков (Сибай) БР Мәғариф министрлығының почет грамоталарына лайыҡ булды.

Шәмбе көндө ҡыҙҙар араһында старт алған республика беренселеген асыу тантанаһында район хакимиәте башлығы Илдар Нафиҡов, уның урынбаҫарҙары ҡатнашты. Был юлы төп кубок өсөн 11 команда уйнаны. Ярыштың тәүге көнөнән үк алдынғылыҡҡа сыҡҡан Күмертау ҡалаһы ҡыҙҙары аҙаҡҡаса позицияны юғалтманы һәм еңеүсе тип танылды. Икенсе, өсөнсө урындарҙы Дыуан һәм Ҡыйғы райондары волейболсылары яуланы.

* * *

Ҡатын-ҡыҙҙарҙың волейбол буйынса йыйылма командаһы Йылайыр районында уҙған район-ара турнирҙа ҡатнашты. Әсәләр көнөнә арнап үткәрелгән ярышта быйыл ете команда — Күгәрсен, Хәйбулла, Әбйәлил, Йылайыр, Ейәнсура райондары һәм Сибай ҡалаһы менән Сибай педколледжы спортсылары көс һынашты.

Волейболсыларҙы Йылайыр районы башлығы И. Фәтҡуллин тәбрикләгәндән һуң ҡыҙыу уйындар башланды һәм кискә хәтлем дауам итте.

Дөйөм иҫәптә Күгәрсен районы спортсыларынан ғына ҡалышып, Әбйәлил йыйылма командаһы почетлы икенсе урын яуланы һәм кубок менән бүләкләнде. Турнирҙа «Иң оҫта волейболсы» номинацияһында райондашыбыҙ Гөлдәр Булатова билдәләнеп, махсус призға лайыҡ булды.

Резеда ХӘСӘНОВА.