Йорттоң ҡыйығы яңыртыла

— Беҙҙең йорт төҙөлөүгә илле йылға яҡын ваҡыт үткән. Өйҙөң башы ябылған шифер тетелеп-тишкеләнеп бөткәйне. Икенсе ҡатта йәшәүселәрҙең фатирҙарының мөйөштәре даими дымлы булыуҙан ҡарайып сыҡҡайны. Болоттар ҡуйырып, ямғыр яуыр булһа, ҡот осор ине. Бына, шөкөр, быйыл беҙҙең йорттоң ҡыйығын яңыртыуға тотондолар. Ҡыуанысыбыҙ сикһеҙ, беҙгә хәҙер ҡар-ямғыр ҡурҡыныс түгел, — ти фатирҙар хужалары.

Тендерҙы отҡан Нефтекама ҡалаһынан «Индустрия» яуаплылығы сикләнгән йәмғиәте эшселәре эште әүҙем генә башлап ебәрҙе. Иң элек, ҡойолоп торған шиферҙы һүтеп алдылар, унан инде сереп бөткән таҡталарҙы ла алыштыралар. Төҙөүселәр әйтеүенсә, яңы ҡыйыҡ заманса технологиялар ҡулланып эшләнә.

Был йорт юл эсендә урынлашҡас, уның янынан үтеп йөрөүселәр төҙөлөш эштәренең бик әүҙем барыуын билдәләй. Ысынлап та, ете кешенән торған бригада иртә таңдан ҡараңғы төшкәнсе тиерлек ал-ял белмәй эшләй: бында бысҡы, сүкеш тауыштары бер минутҡа ла тынмай.

Мәкерле сир таралыу ҡурҡынысы һаҡланыу сәбәпле, тотош илдә юғары әҙерлек режимы индерелгәс, төҙөлөш материалдары менән тәьмин итеү ҡыйынғараҡ тура килһә лә, был сетерекле хәлдән сығыу юлдарын табырға тырышалар һәм төҙөүселәр объектты бер аҙна эсендә файҙаланыуға тапшырырға ниәтләй.

Рәмилә ИСТАНБАЕВА.