Эш октябрҙә тамамланырға тейеш

Ошондай бурыс ҡуйылды Республиканың Торлаҡ-коммуналь хужалыҡ министрлығында муниципаль берәмектәрҙең хакимиәт башлыҡтары менән “Башҡортостан ихаталары” программаһын тормошҡа ашырыу, “Уңайлы ҡала мөхите булдырыу” милли проекты нигеҙендә йәмәғәт биләмәләрен төҙөкләндереү, күп фатирлы йорттарҙағы подъездарҙы комплекслы ремонтлау, Таҙалыҡ көндәрен, өмәләр һәм “Йәшел Башҡортостан” акцияһын үткәреү мәсьәләһе буйынса видеоконференцэлемтә тәртибендә үткән кәңәшмәлә.

Унда “Уңайлы ҡала мөхите булдырыу” проектын ғәмәлгә ашырыу барышы айырым тикшерелде. Мәғлүм булыуынса, Рәсәйҙең Төҙөлөш һәм торлаҡ-коммуналь хужалыҡ министрлығында йәмәғәт биләмәләрен төҙөкләндереү эштәрен башҡарыу ваҡытын күсергәйнеләр. Төбәктәрҙә был ғәмәлдәр төҙөлгән графиктарға ярашлы башҡарылырға тейеш. Шул уҡ ваҡытта бөтә санитария-эпидемиологик талаптарҙың теүәл үтәлеүе шарт.

“Башҡортостан ихаталары” республика программаһы буйынса 1 майға төҙөлөш-монтаж эштәрен башлау планлаштырыла. Быйыл республикала йәмғеһе 390 ихатаны төҙөкләндерергә ниәтләйҙәр. Республика ҡаҙнаһынан программаны тормошҡа ашырыуға 1,8 миллиард һум аҡса бүленә.