“Башҡорт ихаталары» программаһы буйынса эштәр апрелдә башлана

Был  программаны финанслау күләме бер миллиард һумдан ашыу тәшкил итәсәк. Өлөшләтә финанслау тәртибе элеккесә ҡала йәки 94 проценты  Башҡортостан Республикаһы бюджеты иҫәбенә,  5 проценты муниципалитет бюджеты һәм бер проценты  күп фатирлы йорттарҙа йәшәүселәр иҫәбенә. Программаны тормошҡа ашырыуға әҙерлек 2021 йылдың июлендә үк башланған. Күп фатирлы йорттарҙа йәшәүселәр менән дөйөм йыйылыштар үткәрелгән,  ихата биләмәләрен төҙөкләндереү проекттары тикшерелгән, кешеләрҙең эшләнергә тейеш эштәр буйынса талаптары һәм ихтыяждары өйрәнелгән, иҫәпкә алынған. Беренсе сентябргә белгестәр ихата биләмәләрен төҙөкләндереү схемаһын әҙерләгән, ә декабрь башына проект документацияһы төҙөлгән. Бөтә проекттар ҙа Башҡортостандың Торлаҡ-коммуналь хужалыҡ министрлығында яҡлау тапҡан. Әлеге ваҡытта подряд ойошмаларын билдәләү буйынса конкурс процедуралары бара. Апрелдә төҙөлөш-монтажлау эштәре башланасаҡ. Белеүегеҙсә, «Башҡорт ихаталары» йорт яны биләмәләрен комплекслы төҙөкләндереү программаһы алты йылға (2019-2024 йылдар) иҫәпләнгән һәм ихата биләмәләрендә уңайлы мөхит булдырыуға, йәшәү өсөн уңайлы шарттар тыуҙырыуға йүнәлтелгән.