Һаулығығыҙға битараф булмағыҙ

Ауырыуҙы иртә стадияларҙа асыҡлау өсөн табиптарға йыш күренеп торорға, тикшеренеүҙәр үтергә кәрәк. Экологияның боҙолоуы, насар ғәҙәттәр, аҙ хәрәкәтләнеү, консерванттар ҡушылған ризыҡтар менән туҡланыу, төрлө стресстар сир барлыҡҡа килеүенә этәргес бирә. Яман шеш яңы барлыҡҡа килгән ауырыу түгел. Кешеләр был сиргә электән дусар булған. Ул заманда ауырыуҙы асыҡлау өсөн хәҙерге кеүек юғары технологиялар, ҡорамалдар булмаған. Бөгөнгө көндә улар ярҙамында ауырыуҙы бөтөнләй юҡҡа сығарырға йәки туҡтатырға була. Күп осраҡта кеше үҙен һау тоя, табипҡа һирәк күренә. Әммә был ваҡытта уның организмында шештең симптомһыҙ ғына үҫеүе мөмкин. Тире, һөт биҙҙәре, ауыҙ ҡыуышлығы, аналыҡ муйынтығы һәм тура эсәк яман шеше кеүек онкологик сирҙәр-ҙең хәүефле симптомдары барлыҡҡа килгәнгә тиклем тикшереү ярҙамында асыҡлап була. Шуның өсөн дә хәҙерҙән табипҡа мөрәжәғәт итеп, тулы тикшеренеү үтеү мотлаҡ. Яман шештән дауаланып, тулыһынса һауыҡҡан кешеләр күп. Әлеге диагноз үлем тигән һүҙ түгел. Медицина алға бара, яңы химиопрепараттар етештерелә. Ба-рыһы ла яман шештең ниндәй стадияла икәнлегенә бәйле. Сир башланғыс осоронда тулыһынса дауалана. Даими профтикшеренеүҙәр, диспансеризация үтеү сирҙе алдан диагностикаларға ярҙам итәсәк. Башланғыс звенола эшләүсе фельдшерҙар, участка табиптары, терапевтар ауырыу аҙып китмәһен өсөн уны асыҡлай белергә тейеш. Сөнки пациенттар иң тәүҙә уларға бара. Яман шеш менән ауырыған кешене йылдар буйы бер ни борсомай һәм ул үҙен сәләмәт тип уйлай. Шуға ла һаулыҡҡа битараф булмаҫҡа, даими рәүештә анализдар тапшырып торорға кәрәк. Шуныһы үкенесле, беҙҙә бушҡа үткәрелгән диспансеризация тикшеренеүенә лә халыҡты килтереүе ҙур бәлә. 40 йәштән уҙған ҡатын-ҡыҙ ярты йыл һайын күкрәк биҙен маммограф аша тикшереп торорға тейеш. Әгәр ҙә күкрәктә төйөн барлыҡҡа килһә кисекмәҫтән табипҡа күренергә кәрәк. Тағы шуны иҫкәрткем килә: онкологҡа яҡын кешегеҙ менән бергә килеүегеҙ һәйбәтерәк, сөнки яман шеш диагнозы ҡуйылыу менән албырғап ҡалалар, табип һөйләгәндәрен аңламайҙар.