Асҡар сәнғәт мәктәбенең «Фантазия» хореография ансамблендә шөғөлләнеүсе 15 бала «Абҙаҡ» балалар комплексында ял итте һәм смена сиктәрендә уҙған «Танцуй ДА’ BRO–2» хореография проектында ҡатнашты.
— Был проектта ҡатнашып көсөбөҙҙө һынап ҡарарға сәнғәт мәктәбе директоры Г. Ә. Нияҙғолова тәҡдим итте. Мин лагерға хореограф булып урынлаштым, — тип һөйләй Абҙаҡта үҙенең кескәй бейеүселәрен ҡурсалап оҙатып алып йөрөгән педагог Э. Ә. Килдейәрова.
Эльвира Әнүәр ҡыҙы этно-фолк йүнәлешендә оҫталыҡ дәрестәре үткәрә. Бынан тыш, балалар менән Силәбе өлкәһенең, Башҡортостандың билдәле хореографтары хип-хоп, туттинг, поппинг, C-walk, брейк-данс йүнәлештәрендә шөғөлләнә. ТНТ каналының «Танцы», Беренсе каналдың «Танцуй» проекттары еңеүселәре Илшат Шабаев һәм Александр Могилевтан бейеү серҙәренә өйрәнеү бәхете тейә. Кис һайын репетициялар уҙғарыла, смена аҙағында үтәсәк ҙур гала-концертта еңеү яулар өсөн барыһы ла тырышлыҡ һала.
Хореография дәрестәренән тыш, балалар өсөн, әлбиттә, төрлө интеллектуаль уйындар, отряд-ара ярыштар, иртәнге зарядкалар, спорт саралары, бейеү буйынса батлдар үткәрелә. Лагерҙағы һәр көн күңелле, ваҡиғаларға бай була, бошоноп ултырырға һис ваҡыттары ҡалмай.
Гала-концерт юғары кимәлдә ойошторола. Сығыштар өсөн махсус рәүештә костюмдар ҙа тегелә. «Фантазия» коллективы ҡатнаш төркөмдәр категорияһында I дәрәжәле диплом һәм кубок менән бүләкләнә. Шулай уҡ «Асыш» номинацияһында еңеүсе тип табылып, махсус бүләккә лайыҡ булалар.