Асҡар почтальондары һынатмай

«100 дана район гәзите» акцияһында еңеү яулап, редакция бүләгенә был юлы Асҡар ауылы почтальондары лайыҡ булды. Н. Р. Шакирйәнова 114 кешене «Осҡон»ға яҙырһа, Ә. Ә. Шаһимәрҙәнова «Абзелил» гәзитенә 107 абонемент тултырған.

— Һеҙҙең хеҙмәтегеҙ баһалап бөткөһөҙ. Сөнки гәзиттәрҙең тиражының нисек булыуы күпселектә почтальондарҙың хеҙмәтенә бәйләнгән. Шулай уҡ баҫмаларҙың ваҡытында таратылыуынан да тора. Үҙ эшен урын-еренә еткереп башҡарған почтальондар эшләгән участкаларҙа тираждар кәмеүенә юл ҡуйылмай, — тип Әбйәлил мәғлүмәт үҙәге директоры Вил Илһамов тырыш ҡатындарға рәхмәт хатына ҡушып, бүләктәр ҙә тапшырҙы.

Нәсибә Рәүеф ҡыҙы ла, Әнүрә Әхмәтхажи ҡыҙы ла район почта бүлексәһендә оҙаҡ йылдар эшләйҙәр. Гәзит-журналдарҙы, шулай уҡ төрлө хаттарҙы, газ, свет өсөн квитанцияларҙы һуңлатмай ташыған почтальондарҙы халыҡ та ихтирам итә.

— Хәҙер беҙҙең эш бер аҙ еңеләйҙе тиергә була. Сөнки район гәзиттәре урындағы типографияла баҫылғанда, улар сортировка бүлексәһенә килтерелеү менән һәр дананы матур итеп бөкләп ала инек, быға әллә күпме ваҡыт китә ине. Хәҙер ни баҫмалар типографиянан уҡ барыһы ла тейешенсә бөкләнгән килеш килә. Алырға ла таратырға ғына ҡала, — тип ҡыуана почтальондар. — Ваҡытлы матбуғатҡа яҙылыуға кил-гәндә, элек-электән гәзит-журналдар алдырған кешеләрҙе өгөтләргә лә кәрәкмәй, подписка кампанияһы башланыу менән тәүгеләрҙән булып яҙылалар. Ә беҙ, үҙ сиратыбыҙҙа, артабан да гәзит-журналдарҙы уларҙы алдырыусыларға ваҡытында илтергә һүҙ бирәбеҙ.

Р. ДАУЫТОВА.