Иң тәмле ризыҡ – аграр университеттыҡы

Евразия ғилми-белем биреү үҙәге составына ингән Башҡорт дәүләт аграр университетының аҙыҡ-түлек технологиялары факультеты V “Беҙҙең бренд” аҙыҡ-түлек күргәҙмәһе нигеҙендә ойошторолған “Иң яҡшы аҙыҡ-түлек-2020” конкурсында алтын һәм көмөш миҙалдар яуланы.

Атап әйткәндә, иң юғары пробалы миҙалға һәм беренсе дәрәжәләге дипломға ит, һөт ризыҡтары технологияһы һәм химия кафедраһы тәҡдим иткән “Бешкән-ыҫланған фин сервелаты”, “Бешкән итле” колбаса лайыҡ булды. Йәнә лактозаһыҙ йогурт, “Ҡымыҙ+бал” эсемлеге, “Башҡорт” зефиры, икмәк таяҡсалары, “Студент” күмәсе “алтын” менән бүләкләнде. “Иглин” һәм “Краков” хәләл колбасаһы, шулай уҡ талҡан менән ойотҡонан яһалған “Буҙа” эсемлеге икенсе дәрәжәләге диплом яуланы.

Уҡыу йортоноң был уңыштары республикала Рәсәй Президенты Владимир Путиндың май указы менән раҫланған “Фән” милли проектын тормошҡа ашырыуға булышлыҡ итә.

Мәғлүм булыуынса, “Беҙҙең бренд” аҙыҡ-түлек күргәҙмәһе Башҡортостанда бишенсе тапҡыр уҙғарыла.