Тупаҡ ауылы халҡы мөһим сараға яуаплы ҡарай

Исемлеккә ярашлы, Тупаҡта 517 һайлаусы булһа, йәкшәмбе сәғәт 11-гә хәтлем уларҙың 50 проценты  (262 кеше) гражданлыҡ бурысын үтәгән инде. Участка һайлау комиссияһы рәйесе Нәзилә Хөснийәрова әйтеүенсә, йома көндө тауыш биреүгә иң беренсе булып, Тупаҡ ауылының иң оло кешеләренең береһе — 83 йәшлек Рәсүл апа Әхмәтов килгән, унан күп тә үтмәй Фәнирә Муллағәләмова бюллетен тултырған.

Мәктәпкә килеүселәрҙең ишек төбөндә үк тән температураһы үлсәнә, битлек һәм бирсәткә тапшырыла, артабан уларҙы комиссия ағзалары Люзима Хөббөтдинова, Ғәлиә Ғиләжева,  Айсилә Әҡсәнова һәм Әнүзә Хөбитдинова ҡаршылап, исемлеккә ҡултамғаларын алғас, бюллетендәрҙе тапшыра. Барыһы ла эшлекле шарттарҙа бара: видеотеркәү ҡорамалы бар, йәмәғәт күҙәтеүселәре, район хакимиәтенән яуаплы хеҙмәткәр Х. Әхтәмов, хоҡуҡ һаҡсыһы ла үҙ урынында.

83 кешегә өйҙәренә барып һайлау үткәргәндәр, тәүге тапҡыр үҙҙәренең һайлау хоҡуғы менән Наҙгөл Хамматова һәм Илназ Әбйәлилов файҙаланған.