Йәштәр өсөн бөтә юлдар асыҡ

Ул район хакимиәте башлығы Илдар Нафиҡов, уның социаль мәсьәләләр буйынса урынбаҫары Вадим Ғафаров, йәштәр, мәктәп уҡыусылары, “Беренселәр” һәм ирекмәндәр хәрәкәте ағзалары менән осрашты. Сарала һүҙ үҙ бизнесыңды булдырып, уңышҡа өлгәшеү, заманса мөмкинлектәрҙе файҙаланыу, шул иҫәптән дәүләт грант ярҙамы хаҡында барҙы.

Вито Сабиров республикала йәштәр сәйәсәтен тормошҡа ашырыуҙың төп йүнәлештәре, йәштәр өсөн мөмкинлектәр, гранттар һәм уңыш серҙәре тураһында презентация тәҡдим итте. Ул «Йәшлек Экосистемаһы. ТРЕКТАР” федераль һәм төбәк мөмкинлектәре хаҡында ентекле һөйләне. Республиканың Йәштәр сәйәсәте буйынса дәүләт комитеты рәйесе билдәләүенсә, Башҡортостан грант сараларын йәлеп итеү буйынса илдең иң алдынғы төбәктәренең береһе булып тора. Үҫеп килгән быуындың әүҙем булыуын, ирекмәнлек хәрәкәтендә ҡатнашыуҙарын хупланы. Иң яҡшы ирекмәндәр республика Башлығының Почет билдәһе, шулай уҡ төрлө йәштәр премиялары менән бүләкләнеүен әйтте. Әбйәлил йәштәре был осрашыуҙа үҙ маҡсаттарын тормошҡа ашырыуҙа ярҙам итәсәк бик күп яңы һәм файҙалы мәғлүмәт алды.

— Йәштәргә заман бөтә юлдарҙы аса, беҙҙең республика Волга буйы төбәктәре араһында йәштәр һаны буйынса иң алдынғы урынды биләй. Беҙҙең йәштәр тәүәккәл һәм сая, ҙур маҡсаттар ҡуйыуҙан һәм ҡаршылыҡтарҙан ҡурҡмай, — тине Вито Фладис улы. — Хәҙер кемдәндер көтөп ятыр ваҡыт түгел, үҙеңә алға барырға, тырышырға ғына кәрәк.

 Уҡыусылар Вито Фладис улына төрлө һорауҙар бирҙе. Республика йәштәре лидеры үҙе тураһында ла ҡыҙыҡлы итеп һөйләне. Социаль селтәрҙәрҙә әүҙем булыуын, һорауҙар тыуһа, шәхсән мөрәжәғәт итергә мөмкин булыуын белдерҙе.