Ағас ултыртыу өмәләрендә йылдан-йыл кешеләр күберәк ҡатнаша

Акция сиктәрендә Әбйәлил урмансыллығы хеҙмәткәрҙәре, район хакимиәте вәкилдәре, ойошма-предприятиелар хеҙмәткәрҙәре, 1-се Асҡар мәктәбенең «Мәктәп урмансылығы»  түңәрәге ағзалары Ҡаҙмаш урмансылығының 43-сө кварталының 24-се бүлегендә, йәғни Ярлыҡап ауылына яҡын тау битләүендә ҡарағайҙар ултыртты. Был көндө 1,2  гектар майҙанда барлығы биш меңдән ашыу төп ҡарағай үҫентеләре сәселде. Ике йыллыҡ үҫентеләр Ҡырҙас ауылындағы питомникта үҫтерелгән.

Йәшелләндереү акцияһы  һәр ауыл биләмәһендә үтте: парктар, аллеялар һәм скверҙар, мәктәптәр һәм балалар баҡсалары, фельдшер-акушерлыҡ пункттары һәм амбулаториялар, мәҙәни учреждениелар биләмәләрендә таҙартыу һәм ҡарағай, шыршы, миләш, алма, ҡайын, кишер, саған үҫентеләрен ултыртыу ойошторолдо. Ҡушыйҙа, мәҫәлән, ауыл клубы тирәләй сейә, алма, туя үҫентеләре ултыртылды.