Әлдә үҙебеҙҙең Юнысыбыҙ бар!

Бәләкәй генә Исхаҡ ауылы халҡы ла башта ХХII партсъезд исемендәге колхозда, һуңынан «Амангилде» совхозы ҡарамағында булды. Ваҡытында Исхаҡ ауылында йәштәр һөтсөлөк фермаһы булып, улар йыш ҡына районда алдынғы урындарҙы алып килделәр. Ҡайһы берҙәре юғары хөкүмәт наградаларына лайыҡ булды. Исхаҡ ауылының күпселек ир-аттары механизаторҙар булып эшләп алғы сафта булдылар. Ислам Ғәлин оҙаҡ йылдар комбайнда эшләне, урып-йыйыуҙа ҙур хеҙмәт күрһәткестәренә өлгәште, төрлө ҡиммәтле бүләктәр, наградалар менән бүләкләнде. Ғүмере буйы механик булып эшләгән Биктимер ағай Фәттәховҡа (хәҙер мәрхүм инде)  тирә-яҡтан кәңәш һорап күп килә торғандар ине. Алтын ҡуллы оҫта булды ул. Мәрхүм Ғәбдинур ағай Фәттәхов та ғүмеренең аҙағына тиклем тракторҙан төшмәне. Механизаторҙар Милләт ағай Ҡустыбаев, Йыһанур ағай Фәттәхов, Юныс ағай Хәйретдинов һәр ваҡыт алғы сафта булдылар. Исхаҡ ауылы бригадаһы һәр эштә лә алдынғылыҡты бирмәне. Бында оҙаҡ йылдар бригаданы етәкләгән Хәмит ағай Сөнәғәтовтың хеҙмәтенең емештәре күренеп тора.
Үрҙә һанап үтелгән ағайҙар бөгөн дә күпләп мал көтөп, Исхаҡ ауылының йәме булып йәшәйҙәр.
Уңған ағайҙарҙың береһе тураһында ентекләберәк яҙып китәйем. Алдан әйтеүемсә, Юныс ағай Хәйретдинов ғүмере буйы механизатор булып эшләне. Йәй айҙарында бәләкәй Т-25 тракторында мал аҙығы әҙерләүҙә ҡатнашһа, ҡышҡылыҡҡа ҡеүәтле ДТ-75-кә ултырып, төрлө хужалыҡ эштәрен башҡарҙы. Ул һәр ваҡыт алдынғылар рәтендә булды. Ҡушылған эште урын-еренә еткереп, ваҡытында башҡарыуы менән айырылып тора ине ул. Тәжрибәле тракторсы булараҡ йәштәргә ихлас ярҙам итте. Ул ваҡыттарҙа, йәшерен-батырыны юҡ, шәхси хужалыҡтарға утын, бесән алып килһәң, араҡы менән түләү киң ҡолас алғайны. Ә Юныс ағай, ғөмүмән, Исхаҡ ауылы тракторсылары, араҡыны алдын ҡуйманы. 
Мөхәмәт ауылынан Сәфинә еңгәйҙе кәләш итеп алып, ихлас донъя көтәләр улар. Еңгәйҙең тәүге ғаиләһенән булған ҡыҙын, тәүге көндәрҙән үк үҙенә яҙҙырып, үҙенең ике ҡыҙы менән тигеҙ күреп, матур тәрбиә бирҙеләр. Улар биш ейән-ейәнсәргә яратҡан олатай һәм өләсәй. 
Юныс ағай менән еңгәйҙең киң күңеле ваҡытһыҙ мәрхүм булып ҡалған туғандарының балаларына ла етә. Улар йыш ҡына Исхаҡҡа ҡайтып, үҙҙәренә күңел йылыһы алып китәләр. Етмешкә етеп барһа ла Юныс ағай тракторын ташламай. Совхоз тарҡалғас, ул үҙе эшләгән тракторын үҙенә алып ҡалғайны. Хәҙер шул техникаһында ауылдаштарына картуф ерҙәрен һөрөп, утын, бесәнен ташып ҡыуандыра. Үҙҙәре лә күпләп мал аҫырайҙар. «Үҙебеҙҙең Юнысыбыҙ һау булһын», — тип ебәрә Исхаҡ халҡы.
«Ауылда эш юҡ тип һөйләнгәндәренә аптырайым. Хәҙер ҡасан теләйһең бесәнгә төшәһең, хәлеңдән килгәнсә малын көтәһең, сабынлыҡтар етә, шөкөр, тик ялҡауланма ғына. Ә ит һораусылар йылдан-йыл арта ғына, тик бына һуғыштары ғына тынһын», — тип, элекке алдынғы механизатор Юныс ағай менән Сәфинә еңгәй Хәйретдиновтар йәштәргә хас ихласлыҡ һәм дәрт менән донъя көтәләр.

Нәсих СӘЛМӘНОВ. 
Буранғол ауылы.