Башҡортостан баҫыуҙары «аҡыллы» технологияларға күсә

Башҡортостан был йәһәттән алдынғылыҡты бирмәй: республикабыҙҙа пилотһыҙ аппараттарҙы ҡулланыу күләме һуңғы дүрт йылда биш тапҡырға артҡан.

Әлегә баҫыуҙарыбыҙ өҫтөндә 40-ҡа яҡын дрон осоп йөрөһә, 2030 йылға был һанды 150-200-гә еткереү планлаштырыла. Әммә был бары тик башланғыс ҡына. Ауыл хужалығы министры Илшат Фәзрахманов билдәләүенсә, заманса технологиялар ер өҫтө техникаһына ҡарағанда күпкә отошлораҡ. Бигерәк тә ямғырлы көндәрҙә, ер дымлы саҡта, ауыр техниканы баҫыуға индереү ҡыйын, ә дрондар өсөн һауа торошо ҡамасау түгел.

Министрҙың фекеренсә, технологиялар үҫеше менән бергә, яҡын киләсәктә баҫыуҙарҙа меңәрләгән дрон эшләйәсәк. Был техникаларҙың һөҙөмтәлелеге көндән-көн арта бара.

Әммә эш тик дрондар менән генә сикләнмәй. Бөгөн республика фермерҙары:

• 6 меңдән ашыу техниканы навигация системалары менән йыһазландырған;
• баҫыуҙарға метеорологик датчиктар ҡуйған;
• яһалма интеллект ярҙамында зыянлы бөжәктәрҙе һәм ауырыуҙарҙы иртә асыҡлаусы кескәй квадрокоптерҙарҙы әүҙем ҡуллана.

Бындай «аҡыллы» алымдар – тик матур күренеш кенә түгел, ә иҡтисади яҡтан да ҙур файҙа. Роботлаштырылған фермалар һәм пилотһыҙ системалар уңышты арттырырға, малсылыҡта күрһәткестәрҙе яҡшыртырға һәм, иң мөһиме, аҙыҡ-түлек етештереү сығымдарын кәметергә мөмкинлек бирә. Тимәк, киләсәктә табышлы ла, заманса ла ауыл хужалығы беҙҙе көтә.