Башҡортостан - аграр эшҡыуарлыҡ үҫеше буйынса алдынғы

Бөгөнгө көндә республикала ошо тармаҡта 6,9 мең предприятие эшләп килә. Был күрһәткес буйынса республика илдә Краснодар крайы менән Ростов өлкәһенән генә ҡалышып, өсөнсө урында бара.

Статистика күрһәтеүенсә, илдең аграр секторындағы бәләкәй бизнестың өстән бер өлөшө Ставрополь, Волгоград, Һарытау, Ырымбур өлкәләре, Ҡырым, Дағстан һәм Татарстан кеүек төбәктәргә тура килә.

Айырым иғтибарға лайыҡ факт: Башҡортостан аҙыҡ-түлек етештереү сәнәғәтендә лә уңышлы үҫешә. 1,9 мең предприятие менән республика был йүнәлештә илдең иң көслө биш төбәге исемлегенә инде.

Һуңғы йылда аграр секторҙағы үҙгәрештәр бик һиҙелерлек. Айырыуса һөт етештереүселәр араһында әүҙемлек артҡан — был өлкәлә эшҡыуарҙар һаны 2,8 тапҡырға күбәйгән. Шулай уҡ көнбағыш үҫтереү менән шөғөлләнеүселәр 2,6 тапҡырға артһа, йомортҡа етештереү һәм малсылыҡ менән шөғөлләнгән хужалыҡтар 70 процентҡа күбәйгән.

Дөйөм алғанда, Рәсәй буйлап аграр бизнеста 250 меңгә яҡын бәләкәй һәм урта предприятие эшләй, һәм Башҡортостан был ҙур системала мөһим урын биләй.

Ауыл хужалығын үҫтереүгә бағышланған бөтә саралар, 2025 йылда ҡабул ителгән «Аҙыҡ-түлек хәүефһеҙлеген технологик тәьмин итеү» милли проекты ( национальный проект «Технологическое обеспечение продовольственной безопасности») сиктәрендә башҡарыла. Был проект етештереүҙең тотороҡло үҫеше һәм илдең аҙыҡ түлек хәүефһеҙлеген нығытыу өсөн агросәнәғәт комплексының технологик тәьминәтен арттырыуға йүнәлтелгән.