Башҡортостан шифаханалары үҫеш юлында

Был сара төрлө төбәктәрҙән һәм илдәрҙән килгән белгестәрҙе бер майҙансыҡта туплап, һауыҡтырыу өлкәһендәге алдынғы тәжрибә менән уртаҡлашырға мөмкинлек бирәсәк. “Һаулыҡ” милли проектына (национальный проект “Здоровье”) ярашлы Рәсәй Федерацияһының курорт эшен үҫтереү стратегияһы ҡабул ителгән. Ул 2031 йылға тиклем илдә курорт эшен үҫтереү буйынса дәүләт сәйәсәтенең төп йүнәлештәрен билдәләй.

Бөгөн республикала дәүләт ҡарамағындағы һигеҙ шифахана уңышлы эшләп килә. Уларҙағы 3 300-ҙән ашыу урын ял итеүселәр өсөн һәр саҡ асыҡ. Статистикаға күҙ һалһаҡ, шифаханаларыбыҙға ҡыҙыҡһыныу йылдан-йыл арта: 2025 йылда 49 мең кеше һаулығын нығытһа, 2026 йылда был һан 51 меңгә еткән. Бында күрше төбәктәрҙән килеүселәр ҙә, махсус хәрби операцияла ҡатнашыусылар һәм уларҙың ғаилә ағзалары ла күп.

Тармаҡтың иҡтисади күрһәткестәре лә һөйөндөрә. 2026 йылдың тәүге яртыһында шифаханалар 3,3 миллиард һумлыҡ килем алған, был үткән йыл менән сағыштырғанда 6 процентҡа күберәк. Табыш тик ятып ҡалмай, ә яңы корпустар төҙөүгә, заманса медицина ҡорамалдары һатып алыуға йүнәлтелә.

Айырым иғтибар «Красноусол» шифаханаһына бүленә. Унда яңы дауалау-диагностика комплексы асылып, номерҙар фонды киңәйтелә. Бынан тыш, «Красноусол» үҙенең базаһында балалар шифаханаһына ярҙам күрһәтеүҙе үҙ өҫтөнә алды. Был балалар һауыҡтырыу йортонда ла ремонт эштәре башланып, спорт һәм уйын майҙансыҡтары төҙөү планлаштырыла.

Республика Башлығы Радий Хәбиров шифаханаларҙың эшен юғары баһаланы. Ул һауыҡтырыу учреждениеларының заман талаптарына яраҡлашыуы, хеҙмәтләндереү сифатын күтәреүе мөһим икәнен билдәләне. Шулай уҡ шифахана коллективтарының изге эштәре – махсус хәрби операцияла ҡатнашыусыларға 4 мең тоннанан ашыу эсәр һыу ебәреүҙәре – айырым рәхмәткә лайыҡ.