«Минең менән ғорурланасаҡһығыҙ әле...»

Батыр булып тыумайҙар, батырҙарҙы дәүер тыуҙыра тигән һүҙҙәрҙең әсе асылына һуңғы ике йыл айырыуса ныҡ төшөндөрҙө. Асҡар урта мәктәбендә уҡыған зәңгәр күҙле, аҡ йөҙлө, буйсан, шаян егеттең Тыуған илде яҡлап утҡа инер, намыҫты барыһынан да өҫтөн ҡуйып үҙ ғүмерен ҡорбан итер тип берәү ҙә уйламағандыр. Һуғыш уның да пландарында бөтөнләй булмағандыр. Һөнәр эйәһе, ғаилә башлығы, күп балалы атай булып маҡсаттарына ирешә-өлгәшә алға атлаған ир-егеттең тормошон махсус хәрби операция ҡырҡа үҙгәртә. Замандаштарыбыҙ өлөшөнә төшкән ауыр һынауҙы Артур Ғиләжев та үҙенә ҡабул итеп, 2022 йылдың көҙөндә үҙ ирке менән Ҡораллы Көстәр сафына баҫа. Яралана, яңынан аяҡҡа баҫа, һауығып кире алғы һыҙыҡҡа киткәненә тиклем йәш яугирҙәрҙе атырға өйрәтеү бурысы уға ышанып йөкмәтелә. Ҡаһарманлығы өсөн Рәсәй Президенты Указы менән «Батырлыҡ өсөн» миҙалына лайыҡ була. 2023 йылдың 3 октябрендә «ШтормZ» подразделениеһы Донецк өлкәһенә хәрби заданиеға юллана. Ҡаты алыштарҙан һуң һалдат дошман ҡамауында ҡала. Әсиргә төшмәҫ өсөн ул иң сая аҙымға бара — үҙе менән бергә дош-манды шартлата. Яугир үлгәндән һуң Батырлыҡ ордены менән наградлауға тәҡдим ителә.
Белем алған мәктәбендә батырҙың исемен мәңгеләштереү сараһына уның ата-әсәһе Әлфиә һәм Вәзир Ғиләжевтар, апайы Альбина саҡырылғайны, шулай уҡ район башлығының беренсе урынбаҫары Р. Ғ. Хәлилов, социаль сәйәсәт буйынса урынбаҫар Ф. В. Ғафаров, Асҡар ауыл биләмәһе хакимиәте башлығы Т. Н. Әғзә-мов,  район мәғариф бүлеге начальнигы В. С. Абсаҙыева, «Ватанды һаҡлаусылар» дәүләт фондының республика филиалы социаль координаторы Д. Ҡ. Ғәлиуллина ҡатнашты. Юғары класс уҡыусылары ҡатнашлығындағы ҡаһарманлыҡ дәресе Фәнис Сирбаев һүҙҙәренә Рәмил Туйсин яҙған «Артурға...» йыры менән башланды. Дәресте йөкмәткеле, хисле итеп тарих һәм йәмғиәтте өйрәнеү уҡытыусыһы Г. Ә. Сафиуллина алып барҙы. Артур Ғиләжев тураһында тулы биографик һәм хәрби белешмә геройҙың шәхесен күҙ алдына баҫтырҙы. Артур бәләкәйҙән бик ҡыҙыҡ-һыныусан бала була, мәктәп йылдарында ижади һәләттәрен художестволы үҙеш-мәкәрлектә һынай, география фәнен ярата, олимпиадаларҙа ҡатнаша, шахмат уйнай. Мәктәптән һуң Сибайҙа сауҙа-иҡтисад техникумында менеджер һөнәрен ала, компьютерҙы үҙләштерә. Хеҙмәт юлын сауҙа өлкәһендә башлай. Өйләнеп, ике ҡыҙға һәм улға атай була. Ата-әсәһе кеүек ең һыҙғанып эшҡыуарлыҡҡа тотона. Ғүме-ренең һуңғы теүәл бер йылы махсус хәрби операцияла уҙа. 2023 йылдың 14 октябрендә батырҙарса һәләк була.
Яугирҙе бер минутлыҡ тынлыҡ менән иҫкә алғандан һуң һүҙ ҡунаҡтарға би-релде.
— Артур менән күпселектә яҙышып аралаштыҡ, һуғышта йөрөгәс теләгән ваҡытта шылтыратып һөйләшеү мөмкинлеге булманы. Ул тыныслыҡ яулап, иҫән-һау ҡайтырға теләне. Йыш ҡына: «Әсәй, һеҙ минең менән ғорурланасаҡһығыҙ әле», — тип ҡабатлай ине.  Баламды юғалтыуҙан йөрәгем өҙөлә, шул уҡ ваҡытта мин уның менән сикһеҙ ғорурланам. Интернет аша беҙҙе эҙләп табып ҡайғы-хәсрәтебеҙҙе бүлешкән дуҫтарына, яуҙаштарына рәхмәтлемен. Улымдың яу ҡырында ла ни тиклем игелекле, хәстәрлекле, яуаплы кеше булыуы тураһында иптәштәренең хәтирәләре, рәхмәттәре артабан йәшәргә көс бирә, — тине батыр ул тыуҙырып-үҫтергән Әлфиә Ғилметдин ҡыҙы.
Мәғариф бүлеге етәксеһе В. С. Абса-ҙыева уҡыусыларҙы тыныс күк йөҙө өсөн һәләк булған Артур Ғиләжевтың исемен юғары күтәреп, ул уҡыған мәктәптә белем алыуҙары менән ғорурланып йәшәргә өндәне. Шәхси хәтирәләргә бирелеп, Сибайҙа студент йылдарының Артур ме-нән бер осорҙа уҙыуын, оҙон буйлы, һылыу яҡташ егеттең күп ҡыҙҙарҙың йөрәгенә ут һалыуын иҫкә алды.
Артурҙың беренсе уҡытыусыһы Ә. Р. Ниғмәтуллина уҡыусыһының башланғыс кластарҙы тик «бишле» билдәләренә тамамлауын, изге күңелле, тырыш, бөхтә, тәртипле булыуы менән айырылып тороуын иҫкә алды. «Шундай егеттең арабыҙҙан иртә китеүе бик йәл. Тик ул башҡаса булдыра алмаҫ ине. Уҡыусым менән ғорурланам, ҡыйыу, илһөйәр ул үҫтергән ата-әсәһенә рәхмәт белдерәм», — тине ул.
Герой партаһын асыу хоҡуғы Әлфиә һәм Вәзир Ғиләжевтарға бирелде. Яугир-ҙең фотоһүрәте менән бергә биографияһы, хәрби ҡаҙаныштары тураһында һөйләгән парта артына иң беренсе булып ултырыу хоҡуғы уҡыу алдынғыларына — 9-сы «в» класынан күп фәндәрҙән олимпиадалар еңеүсеһе Руслана Нишанова менән Бөтә Рәсәй экология олимпиадаһы еңеүсеһе, «Мәктәп урмансылығы» хәрәкәте активисы Нәғим Нафиҡовҡа бирелде. Уҡыусылар герой рухы алдында Тыу- ған ил һаҡсылары тураһындағы яҡты хәтергә тап төшөрмәҫкә, илһөйәр булып үҫергә, ғәҙел, тәртипле булырға, тырышып уҡырға ант итте. Герой партаһы мәктәптең тарих кабинетында урын аласаҡ.
Ошо уҡ көндә мәктәп диуарында Артур Ғиләжевҡа арналған мемориал таҡтаташ асылды. Тантаналы митингыла ҡатнашыусылар мемориалға сәскәләр һалды. 
Гөлнара КҮСӘРБАЕВА.