Мәңге иҫтә ҡалырһың, яугир!

Матәм сараһында Илдар Таһир улы Динир Рауил улының туғандарының ауыр ҡайғыһын уртаҡлашты.
— Хөрмәтле Айгиз Рауил улы, Илгиз Рауил улы һәм Дәүләт ауылы биләмәһе халҡы! Ҡыҙғанысҡа күрә, бөгөн беҙ тағы ла бер яҡташ егетебеҙҙе юғалттыҡ. Динир Рауил улы һуғыштың тәүге көндәренән алып аҙағынаса үҙенең антына тоғро ҡалды һәм үҙ-үҙен аямайынса тыныслыҡ өсөн көрәште. Илһөйәр, ҡыйыу йөрәкле егетебеҙҙең иманы юлдаш булһын. Бәхил бул, Динир ҡустым! — тине ул хушлашыу телмәрендә.
Йәлил Нәсиб улы Башҡортостан Республикаһы Башлығы Радий Хәбиров һәм Дәүләт Йыйылышы — Ҡоролтай депутаттары корпусы исеменән батырҙың туғандарына сабырлыҡ теләне.
— Украинала нацизмдың күкрәп сәскә атҡан мәлендә, хөкүмәт ябай халыҡтан ярҙам һораған саҡта, Динир беренселәрҙән булып сафҡа баҫты. Шуға күрә лә уның яҡындары хөкүмәт тарафынан ярҙам һәм иғтибар менән солғап алынасаҡ. Беҙ ошондай геройҙарыбыҙ менән ғорурланырға хаҡлыбыҙ, киләсәк быуынды улар өлгөһөндә тәрбиәләргә бурыслыбыҙ, — тине ул. 
Туғандары исеменән сығыш яһаған Римма Батыршина ҡайғыларын уртаҡ-лашырға килгән район хакимиәтенә, Дәүләт ауылы биләмәһенә, ауылдаштарына оло рәхмәттәрен еткерҙе. 
— Ауылыбыҙға тағы ла ҡайғы килде. Мобилизацияға эләгеп, Динир хәрби операцияға китте тигәс, ныҡ ҡайғырҙым. Йәш кенә бит әле тинем. Уҡыусымды отпускаға ҡайтҡас, магазинда тап иттем. Ҡыуанысын йәшермәйенсә, «Мин ҡайттым!» — тип әллә ҡайҙан һаулыҡ һорашты. Ул һәр ваҡыт шулай алсаҡ булды. Ярҙамсыл, итәғәтле, эшһөйәр егет ине. Мәктәптә уҡығанында бер ваҡытта ла ауыр эштән тартынманы, хеҙмәт һөйөүсән малай булды. Бер туған ҡустыһы менән ағаһына сабырлыҡ теләйем, ҡалған ир-егеттәребеҙҙең иҫән-һау йөрөп ҡайтыуына доғалар ҡылайыҡ, — тип һөйләне күҙ йәштәре аша уҡытыусыһы Йәмилә Шәрипова. 
Класташтары һәм дуҫтары исеменән сығыш яһаған Альбина Фәттәхова менән Азамат Илһамов геройҙың эскерһеҙ, кешелекле булыуын билдәләне. «Үҙенән алда кешене уйланы, дуҫтарына тоғро булды, ныҡ яҡшы кеше ине» тигән һүҙҙәр яңғыраны мәрхүм хаҡында. 
Динир Ҡараҡаев 1993 йылдың 19 майында Селивановка ауылында күп балалы ғаиләлә баш бала булып донъяға килгән. Өс малай — Динир, Илгиз, Айгиз исемле уландар ата-әсәһенең ныҡлы таянысы булып үҫә. Ҡыҙғанысҡа ҡаршы, егеттәрҙең ата-әсәһе бер-бер артлы баҡыйлыҡҡа күсә. Ауыр ҡайғыларҙан һис тә бөгөлөп төшмәй улар — һәр береһе тормошта үҙ урынын таба, өс тағандай бер-береһенә ныҡлы арҡа терәп торалар.
Д. Ҡараҡаев башланғыс кластарҙа Селивановка мәктәбендә уҡый, артабан Дәүләт урта мәктәбендә белем ала. Мәктәп йылдарында ул үҙен тыныс холоҡло уҡыусы итеп күрһәтә, мәктәп тормошонда үткәрелгән барлыҡ спорт сараларында әүҙем ҡатнаша. 
Күңеле ҡушыуы буйынса 93-сө һөнәрселек училищеһында тракторсы һөнәрен ала. 2011-2012 йылдарҙа Ырымбур өлкәһендә, хәрби частең разведка төркөмөндә, Ватан алдындағы бурысын үтәп ҡайта. Һуңынан төрлө ойошма-предприятиеларҙа эшләй. 
2022 йылда илдә өлөшләтә мобилизация иғлан ителгәс, тәүгеләрҙән булып нацизмды тар-мар итер өсөн Украина биләмәһенә юллана. Тәүҙә Свердлов өлкәһенең Елань ҡалаһында хәрби уҡыуҙарҙа була, һуңынан Запорожье йүнәлешендә, алғы һыҙыҡта дошман менән алыша. Яу яланында үҙен ҡыйыу йөрәкле батыр итеп күрһәтә, иптәштәренә тоғро дуҫ була, хәрби бәрелештәрҙә әүҙем ҡатнаша.
Динир Рауил улы күптән түгел икенсе тапҡыр ваҡытлыса ялға ҡайтҡан. Ҡыҙғанысҡа ҡаршы, 9 мартта ауыр сирҙән ҡапыл баҡыйлыҡҡа күскән. Геройҙы мосолман тәғлимәттәренә ярашлы, Дәүләт ауылы зыяратына ерләнеләр.
Рамаҙан айының тәүге көнөндә гүр эйәһе булған яҡташыбыҙҙың иманы юлдаш булһын. Фани донъяла ҡалған бер туған ағаһы һәм ҡустыһының,  туғандарының ауыр ҡайғыһын уртаҡлашабыҙ. Тыныс йоҡла, батыр! Һин мәңгегә беҙҙең хәтерҙә ҡаласаҡһың...
Гөлфиә ХӘСӘНОВА.