Батырлығың онотолмаҫ...

Марсель Нәзиф улы 1968 йылдың 28 июнендә Свердлов ҡалаһында донъяға килә. Ете айынан Борай районы Бустанай ауылында йәшәүсе атаһының һеңлеһендә тәрбиәләнә. Борай урта мәктәбен тамамлағас, 1986-1987 йылдарҙа Совет Армия сафында хеҙмәт итә. Йыр-моңға ғашиҡ егет, әрменән ҡайтҡас Стәрлетамаҡ мәҙәни-ағартыу техникумына уҡырға инә. Өҙҙөрөп баянда уйнаған зәңгәр күҙле, аҡ йөҙлө, һап-һары сәсле татар егете кемдәрҙең генә йөрәгенә ут һалмағандыр? Ләкин уның йөрәген ошо уҡ уҡыу йортонда уҡыған башҡорт ҡыҙы – Ишбулды ауылынан Рәшиҙә Хәйбуллина яулай. Йәштәр өйләнешкәс Магнитогорск ҡалаһына эшләргә йүнәләләр. Унан инде Ишбулды ауылында төпләнәләр. Марсель Нәзиф улы урындағы клубта, Хәлил мәҙәниәт йортонда баянсы булып эшләне, үҙ һөнәренең ысын оҫтаһы ине.
Талиповтар ике улға – Артур менән Тимурға ғүмер бирә. Ҡыҙғанысҡа ҡаршы, 10 йыл элек Марсель Нәзиф улы тол ҡала. Байтаҡ йәш ҡыуыуына ҡарамаҫтан, Украинала барған махсус хәрби операцияға уҙаман битараф ҡала алмай. 2023 йылдың ноябрендә контракт төҙөп, ил һағына юллана. Уҡсы вазифаһында хәрби операцияларҙа ҡатнаша.
Ағымдағы йылдың 7 мартында район хәрби комиссариаты ҡайғылы хәбәр ала. Унда Донецк Халыҡ Республикаһын азат итеү буйынса барған яуҙарҙа ҡаһармандарса һуғышҡан М. Н. Талипов 11 февралдә Авдеевканы алғанда һәләк булды тип хәбәр ителә. Ул һуңғы һулышынаса хәрби антына һәм Тыуған иленә тоғро ҡала. 
Уҙған шәмбелә яугир менән хушлаштылар. Матәм сараһына район етәкселеге килде, мәрхүмдең туғандары, ауылдаштары йыйылды. 
–  Бәләкәй генә Ишбулды ауылына, ғөмүмән, районға йәнә ҡайғы килде. Батырҙарса һәләк булған тағы бер яҡташты һуңғы юлға оҙатабыҙ. Бик ауыр, ҡыйын хәл, йөрәк яна, йән әрней. Белеүебеҙсә, Марсель ағай махсус хәрби операцияға үҙ теләге менән киткән уҙамандарҙың береһе. Ул үҙенең йәнен башҡа егеттәр менән бер рәттән беҙҙең азатлыҡ һәм тыныслыҡ өсөн бирҙе. Атайҙы юғалтыу ныҡ ауыр булһа ла, Артур, Тимур, һеҙ уның ҡаһарманлығы тураһында иҫләп, ғорурланып йәшәргә тейешһегеҙ. Ә беҙ иһә, үҙ сиратыбыҙҙа, уға ҡарата рәхмәт-ихтирамыбыҙҙы иҫтәлеген мәңгеләштереү буйынса эштәребеҙҙә күрһәтәсәкбеҙ. Һуғыш тиҙерәк бөтһөн, ҡалған егеттәр еңеү менән иҫән-һау әйләнеп ҡайтһын,  – тине район башлығы И. Т. Нафиҡов. 
БР Дәүләт Йыйылышы – Ҡоролтай депутаты Й. Н. Зәйтүнов Башҡортостан Республикаһы Башлығы Р. Ф. Хәбиров, Ҡоролтай  депутаттары һәм  шәхсән үҙенең исеменән мәрхүмдең балала- рының, туғандарының ауыр ҡайғыһын уртаҡлашты. Ил намыҫын яҡлап ҡулына ҡорал алған, дөрөҫлөк, тыныслыҡ өсөн көрәшкән, әсирлектең әсе михнәттәрен татыған һәм батырҙарса һәләк булған яҡташыбыҙҙы оноторға хаҡыбыҙ юҡ, ғаиләһенә Хөкүмәттән ярҙам күрһәте-ләсәк, тине ул.
Мәрхүмдең туғандары исеменән һүҙ алған Рәсүл Хәйбуллин кейәүҙәрен ҡәҙер итеп һуңғы юлға оҙатырға килеүселәргә рәхмәт әйтте. 
Хәрби часть вәкиле, рядовой Руслан Пахомовтың хеҙмәттәше Марсель Тали- пов менән яу ҡырында юлдары киҫешмәһә лә, уның менән бергә хәрби операцияларҙа ҡатнашҡан иптәштәре ауыҙынан яугирҙең ысын ир-егет, яҡшы, игелекле һалдат булыуы, бер кемгә лә насарлыҡ ҡылмауы тураһында ишеткәндәрен һөйләне.
– Марсель Талиповтың үҙ теләге менән илебеҙҙең яңы республикаларын – Донецк һәм Луганскиҙы яҡларға барыуы ғына ла ҙур йөрәк талап иткән ҡыйыу аҙым. Яугирҙең улдарының ҡайғыһын уртаҡлашам, миңә лә был ауыр кисерештәр таныш, был һуғышта мин дә ағайымды юғалттым, – тине ул.
Бәхил бул, яугир! Батырлығың һис ҡасан онотолмаҫ. Һине белгәндәр хәтерендә ябай, шаян, бошона белмәҫ, асыҡ күңелле кеше, бармаҡтарынан моңдар түгелгән талант эйәһе булып ҡалырһың, һағындырырһың...
Гөлнара КҮСӘРБАЕВА.