Батыр даны – мәңгелек

А. Әхмәтйәнов 1976 йылдың 6 октябрендә Әлмөхәмәт ауылында тыуған. Азат Идиал улы 1-9 кластарҙа Сиҙәм урта мәктәбендә белем ала. Мәктәп йылдарынан уҡ шуҡ, теремек, ярҙамсыл, алсаҡ булыуы менән башҡаларҙан айырылып тора. Йәшел күҙле, ерән сәсле малайҙы уҡытыусылар ҙа ярата, тиҫтерҙәре араһында ла һөймәлеклеге менән алдыра.
 1994 йылда Ватан алдындағы изге бурысын үтәргә юллана. Әрменән ҡайтҡас, “Урал” колхозында хеҙмәт юлын башлай. Һуңынан Магнитогорск ҡалаһында төрлө ойошма-предприятиеларҙа эшләй. 
Нацизмға ҡаршы барған көрәштә ул да ситтә ҡала алмай. 2023 йылдың август айында үҙ теләге менән Украинаға юл ала. Донбасс биләмәһендә барған ҡаты бәрелештәрҙә  үҙ-үҙен аямай көрәшә, иптәштәренә тоғро дуҫ була, яу яланында ҡурҡыу белмәҫ ҡыйыу һалдат итеп күрһәтә. 
Үткән йылдың сентябрь аҙағынан алып Азат Идиал улы менән бәйләнеш бөтөнләйгә өҙөлә. Яҡындары өмөттәрен өҙмәй, уның тере булырына ышана һәм көтә. “Үлеләр араһында кәүҙәһе булмағас, һуңғы минутҡаса тере тип көттөк, доғалар ҡылдыҡ, Хоҙайҙың ҡөҙрәтенә ышандыҡ. Ләкин быйылғы яҙ барлыҡ өмөт-хыялдарҙы селпәрәмә килтерҙе”, – тип күҙ йәштәре аша һөйләй мәрхүмдең яҡындары. 
13 мартта район хәрби комиссариатына Азат Идиал улының 27 сентябрҙә Донбасс биләмәһендә барған ҡаты бәрелештәрҙә батырҙарса һәләк булыуы хаҡында хәбәр ителә. 
Батырыбыҙ менән хушлашыу өсөн ойошторолған матәм саралары Йәнгел һәм Сиҙәм ауылдарында үтте. Ул ҡасандыр белем алған мәктәп тә бойоҡ һәм күңелһеҙ ҡаршы алды. Азат Идиал улы менән хушлашырға яҡындары, туғандары, ауылдаштары, район хакимиәте вәкилдәре килде. Фотоһүрәте янына ҡыҙыл раузалар һалынғандан һуң, матәм сараһы башланды.
Район хәрби комиссары Максим Гребенщиков бәхилләшергә килеүселәрҙе мәрхүмдең тормош юлы менән таныштырғандан һуң, район хакимиәте башлығы Илдар Нафиҡовҡа һүҙ бирҙе.
– Ҡыҙғанысҡа күрә, бик ауыр заманда йәшәйбеҙ. Украинала барған махсус хәрби операцияла һәләк булыусылар көндән-көн арта бара. Ә беҙ иһә тыныс тормошта йәшәүселәр ил именлеге өсөн шаһит киткән хөрмәтле ағай-энелә- ребеҙҙең батырлығын оноторға хаҡыбыҙ юҡ. Беҙ уларҙың иҫтәлеген мәңгеләштереү өсөн барыһын да эшләргә тырышасаҡбыҙ. Азат Идиал улының да батырлығын, нацизмға ҡаршы барған көрәштә йәнен фиҙа ҡылыуын онотмаҫ- быҙ, – тине ул. – Людмила Александровна, һеҙгә һәм яҡындарығыҙға сабырлыҡ теләйем. Геройыбыҙҙың ауыр тупраҡтары еңел, ҡараңғы гүрҙәре яҡты булһын. Бәхил бул, Азат ағай!
Башҡортостан Республикаһының Дәүләт Йыйылышы - Ҡоролтай депутаты Йәлил Зәйтүнов:
– Людмила Александровна, мәрхүм- дең яҡындары! Иңдәрегеҙгә төшкән ҡара ҡайғыны күтәрерҙәй көс һәм рухи ныҡлыҡ теләйем, – тип БР башлығы Радий Хәбиров һәм депутаттар корпусы исеменән батырҙың туғандарының ауыр ҡайғыһын уртаҡлашты. – Азат Әхмәтйәнов беҙ тыныс тормошта йәшәй алһын өсөн, ғәҙеллекте даулап, дөрөҫлөктө яҡлап һәләк булды. Ул тәүгеләрҙән булып яу яланына үҙ теләге менән киткәндәрҙең береһе ине. Азат Идиал улының йәне йәннәттә булһын, тыныс йоҡлаһын.
Туғандары исеменән сығыш яһаған Илһам Әхмәтйәнов ҡустыһын һуңғы юлға оҙатырға килгәндәргә рәхмәт белдерҙе, туғанының ярҙамсыл һәм йомарт булыуын билдәләне.
– Бөгөн беҙ уҡыусыларыбыҙҙың береһе Азат Әхмәтйәнов менән хушлашабыҙ. Ул малай сағынан әүҙем, теремек булды. Хәрби хеҙмәтен тултырып ҡайтҡас та, мәктәпкә килде. Ауыр заманда, 90-сы йылдарҙа Ватан алдындағы бурысын иҫән-һау үтәп ҡайтыуына һөйөнөп бөтә алманы, ғорурлыҡ менән һөйләне. Һәм Украинаға киткән тигән хәбәрҙе ишеткәс тә, ғәжәпләнмәнем, сөнки ул шундай тәрбиә алған ир-егет ине. Уның ҡанында патриотик рух көслө булды, - тине үҙенең телмәрендә Салауат Рәжәпов.
Ҡатыны Людмила Әхмәтйәноваға Рәсәй Федерацияһының байрағы тапшырылғандан һуң, мәрхүмде Әлмөхәмәт ауылы зыяратына оҙаттылар. Ул тыуып үҫкән ауылында мәңгелек йортҡа күсте. 
Йәнен-тәнен аямайынса һуңғы минутына тиклем хәрби антына тоғро ҡалған батыр яҡташыбыҙҙың иманы юлдаш булһын. Яугиргә мәңгелек дан!
Гөлфиә ХӘСӘНОВА.