Илебеҙ киләсәге өсөн ғүмерен бирҙе

Ҡыҙғанысҡа ҡаршы, һуңғы ике аҙна эсендә Иҫке Балапан ауылын икенсегә ҡайғы баҫты. Ҡайғы яңғыҙ йөрөмәй тиеүҙәре шулдыр, күрәһең. 3 октябрҙә генә ауылдаштары махсус хәрби операцияла батырҙарса һәләк булған Алмас Исламовты һуңғы юлға оҙатҡайнылар. Салауат Ғәлиуллин да Тыуған ил яҙмышы өсөн битараф ҡала алмаған ысын ир-аттарҙың береһе була. Тулы бәхетле ғаиләһе булған, хеҙмәт юлын металлургия комбинатында лайыҡлы үтеп хаҡлы ялға сыҡҡан кешенең инде пенсия ашап, башлы-күҙле булған улы һәм ҡыҙының  шатлыҡ-ҡыуаныстарына төрөнөп, ейәндәр һөйөп йәшәй башлаған ғына сағында тыныс киләсәк  хаҡына  ил һағына баҫыуы ошо хаҡта һөйләй.
Тыуған ауылындағы башланғыс мәктәпте тамамлағас, артабан белем үрҙәрен яулар өсөн Салауат Байымға йөрөп уҡый. Уҡыуға етди ҡарай, буш-юҡтан дәрестәр ҡалдырмай, тырыш һәм тәртипле була, спортты, тарихты ярата. Тулы булмаған урта белем алып, 8-се кластан һуң 93-сө һөнәрселек училищеһына юл тота, киң профилле механизатор һөнәрен үҙләш-терә. 1990 йылдың көҙөндә Совет Армия-һы сафына саҡырыла. Һалдат бурысын Германияла үтәй. 
Армиянан һуң Магнитогорск ме-таллургия комбинатына эшкә төшә. Ҡайҙа ғына эшләмәһен С. С. Ғәлиуллин һәр ерҙә хөрмәт ҡаҙана, ярҙамсыл һәм эшһөйәр кеше булыуы менән айырыла. Ниндәй генә эшкә тотонһа ла, барыһы ла ҡулынан килә.
Ғаилә тормошонан да уңа. Ҡатыны Әҡлимә Рәхим ҡыҙы менән ике бала үҫтереп, уларға гөрләтеп туйҙар үткәреп, оло тормош юлына сығаралар. 
Ағымдағы йылдың апрель айында Салауат Ғәлиуллин үҙ теләге менән ил һағына баҫа. Үкенескә күрә, 27 майҙа алғы һыҙыҡта батырҙарса көрәшкән өлкән уҡсының ғүмере өҙөлә.
Һәм бына ул йәнтөйәгенә әйләнеп ҡайтты... Ата-бабалары ятҡан ергә ҡай-тыуҙан батыр рухы тыныслыҡ тапҡан-дыр, тип ышанғы килә. С. С. Ғәлиуллин менән бәхилләшеү сараһы Иҫке Балапан ауылы мәсете янында уҙҙы. БР Дәүләт Йыйылышы — Ҡоролтай депутаты Й. Н. Зәйтүнов, район башлығының социаль мәсьәләләр буйынса урынбаҫары В. Ф. Ғафаров яугирҙең әсәһе Мәүлиҙә Ихсан ҡыҙының, хәләл ефете Әҡлимә Рәхим ҡыҙының, улы Азаматтың һәм ҡыҙы Юлиәнең, туғандарының ауыр ҡайғыһын уртаҡлашты.  
— Салауат ағай ҙа беҙҙең яҡты киләсәк өсөн йәнен-тәнен аямай хәрби бурысын ғүмеренең ахырынаса намыҫлы үтәне. Беҙ уның алдында баш эйәбеҙ. Батыр ҡаһарманлығы, иҫтәлеге халыҡ хәтерендә мәңге йәшәйәсәк, — тине Вадим Фәнил улы. 
Дуҫтары, класташтары исеменән Зәмирә Мөхәмәтова сығыш яһаны:
— Салауатты 4-се класҡа Байым мәктәбенә уҡырға килгән көндән беләбеҙ. Ул иғтибарлы, ихтирамлы, һәр ваҡыт үҙенең һүҙендә торған ысын егет булды. Ниндәй генә  эште башлаһа ла, аҙағына тиклем еткереп ҡуйыр ине. Ҡулы  эш белде. Мәктәп йылдарында тимур командаһында йөрөй торғайныҡ. Алыҫ тип тормай, Иҫке Балапан ауыл егеттәре күрше ауылдан килеп, Байым инәйҙәренә ярҙам итеп ҡайталар ине. Салауат оло-ларға иғтибарлы, кеселәргә кеселекле булды. Беҙ класташтары, уның менән ысын күңелдән ғорурланабыҙ. Махсус хәрби операциянан ситтә ҡалмаясағы уның характерында ине. Ул ғүмерен яҡты киләсәк  өсөн бирҙе. Балалары, ысын күңелдән атайығыҙ менән ғорурлана алаһығыҙ һәм был буш һүҙ түгел. Бәхил бул, класташ! Һинең турала яҡты иҫтәлек бар халыҡтың күңелендә мәңгегә ҡалыр.
— Шаһит булып киткәндәрҙең урыны шәриғәт буйынса ожмахталыр, — тине  Байым ауыл биләмәһе башлығы Д. З. Фәт-хуллин ауыр ҡайғы кисергән ғаиләгә күркәм сабырлыҡ теләп.
Мәрхүмдең ағаһы Данис Ғәлиуллин ҡустыһы менән бәхилләшергә килгәндәр- ҙең барыһына ла рәхмәт әйтте һәм уны һуңғы юлында зыяратҡа тиклем күтәреп алып барыуҙы һораны. Тыуған ил өсөн башын һалған тормош иптәше тураһында иҫтәлек итеп һаҡлауға Рәсәй байрағы яугирҙең ҡатынына тапшырылды. Тыныс йоҡла, батыр!
Гөлнара КҮСӘРБАЕВА.