Ил онотмаҫ батырҙарын

Легендар комдив, Ҡыҙыл Байраҡ һәм Ҡыҙыл Йондоҙ ордендары кавалеры, Рәсәй Геройы Миңлеғәле Шайморатовтың тыуыуына 125 йыл тулыуға ҡарата район хакимиәтендә үткән тантаналы сара “Мәңгелек дан ҡаҙанды Шайморатов генерал” тип аталды. Уның сиктәрендә хәҙерге дәүер батырҙарына – махсус хәрби операцияла һәләк булған һәм хәбәрһеҙ юғалған яҡташтарыбыҙға яуҙағы ҡаһарманлыҡтары өсөн бирелгән хәрби наградалар уларҙың ата-әсәләренә, ҡатындары һәм балаларына, туғандарына тапшырылды.   

Бөйөк Ватан һуғышында  башҡорт атлылары ғәскәре башында данлы һәм шанлы яу юлы үткән легендар батырыбыҙ тураһындағы документаль фильмды тыныс  ҡына ҡарап булманы. Сөнки хәҙерге ваҡытта ла илебеҙ нацизмға ҡаршы көрәш алып барырға мәжбүр. Ҡан ҡойоп ғүмерҙәренең хаҡы менән Тыуған илде яҡлаған яугир олатайҙарыбыҙ ҡурҡыу белмәҫ ҡыйыулығы һәм илһөйәрлек рухы менән Бөйөк Еңеүҙе яулаған. Миңлеғәле Шайморатовтың ҡаһарманлығы бер ҡасан да хәтерҙән юйылмаясаҡ. Улар өлгөһөндә тәрбиәләнгән, атай-олатайҙар даны менән ғорурланып үҫкән ейәндәр быуынына махсус хәрби операция алып барылған утлы осор тура килде. Унда ил намыҫын яҡлап яҡташтарыбыҙ ҙа ҡаһармандарса һуғыша. Үкенескә күрә, һуғыш ҡорбандарһыҙ түгел. Әсәйҙәрҙе ҡан илатып, атайҙарҙы бер көн эсендә ҡартайтып, ҡатындарҙы тол, балаларҙы етем ҡалдырып яугир ир-егеттәребеҙ әле был, әле теге ауылға цинк табутта ҡайта... Матәм митингыһында ҡатнашыусы хәрби часть вәкилдәренән һәр ваҡыт яҡташтарыбыҙҙың ҡыйыулығы, һуңғы һулышынаса ҡаһармандарса һуғышыуы, хәрби антына тоғро ҡалыуы тураһында ишетергә тура килә. Һәм былар һис тә буш һүҙҙәр түгел. Күптәренең үлгәндән һуң юғары наградаларға күрһәтелеүе ошо хаҡта һөйләй. Һәм ошо сарала улар яугирҙәрҙең яҡындарына иҫтәлек итеп тапшырылды. 
Әбйәлилдең данлы улдары Шамил Әбделғазин, Заһит Абдуллин, Азат Әхмәтйәнов, Вадим Баһаув, Наил Искәнйәров, Салауат Исмәғилев, Альберт Ишбулатов,  Әмир Камалов, Юнир Хажиәхмәтов, Евгений Цветков һәм Илнур Әхмәҙиевтың Батырлыҡ өсөн ордендарын, һуңғыһының быға өҫтәп “Хәрби отличие өсөн” миҙалын һөйөклө әсәйҙәре, хәләл ефеттәре һәм балалары ҡулдарына алғанда улар үҙҙәре генә түгел бөтә зал иланы. Фәдис Сафиндың, Рәзил Дауытовтың үлемһеҙ батырлыҡтары хаҡында һөйләгән Генерал Шайморатов ордены егеттәрҙең ата-әсәләренең дә уңалмаҫ йөрәк яраһын ҡуҙғатты. МХО-ла һәләк булған Динир Ҡараҡаевтың һәм хәбәрһеҙ юғалған Иштуған Басировтың “Генерал Шайморатов” миҙалдары һаҡлау өсөн яҡын туғандарына тапшырылды. 
Хәрби бурысын үтәгәндәге батырлығы өсөн үлгәндән һуң РФ Президенты Указы менән Рәсәй Геройы исеме бирелгән 93-сө гвардия зенит ракета полкының хәрби расчет командиры, гвардия прапорщигы Тамерлан Илһамовтың исемен мәңгеләштереү буйынса “А. А. Расплетин исемендәге “Алмаз” фәнни-производство берекмәһе” асыҡ акционерҙар йәмғиәтенең 92Н6А №МЕ2120ИВ изделиеһына “Тамерлан Илһамов” исемен биреүе тураһындағы документ Герой әсәһе Айгөл Шакироваға тапшырылды. 
Тантанала бер төркөм йәш егеттәр хәрби юлдағы ҡаҙаныштары өсөн наградалар алды. Азат Мортазин  “II дәрәжә ҡыйыулыҡ өсөн”, Зөлфәт Нәжметдинов “Хәрби туғанлыҡты нығытҡан өсөн”, Рәмис Насибуллин “МХО-ға ярҙам өсөн” миҙалдарына лайыҡ булды. Әлеге ваҡытта әрме бурысын үтәгән Вәхит Заманов, Илнур Хәсәнов һәм Рәфис Хөсәйеновты ысын ир-егет, илһөйәр Ватан һаҡсыһы итеп тәрбиәләгән өсөн  ата-әсәләре хәрби часть командирҙарының Рәхмәт хатын алып ҡыуанды. 
– Бөгөн Рәсәй Геройы Миңлеғәле Шайморатовтың тыуған көнөндә бик әһәмиәтле сараға йыйылғанбыҙ. Баш- ҡортостандың данлы улы менән бергә, ҡыҙғанысҡа ҡаршы, МХО биләмәһендә хәрби бурысын үтәгәндә һәләк булған геройҙарыбыҙҙы ла иҫкә алдыҡ. “Шайморатов вариҫтары сигенә белмәй!” тигән һүҙҙәр хәҙерге көндәрҙә бигерәк көнүҙәк. Ҡайһы ғына фронтта булмайыҡ – алғы һыҙыҡта һәм илебеҙҙең яңы төбәктәрендә һуғышҡан яугирҙәр ҙә, хеҙмәт яланындағы беҙ ҙә берҙәм көс менән еңеү өсөн ынтылабыҙ һәм был көндөң тиҙерәк етеүен көтәбеҙ. Яу яланында Ватан өсөн башын һалған ир-егеттәр тураһында яҡты хәтер һаҡлау беҙҙең мөҡәддәс бурыс. Геройҙарға мәңгелек дан! – тине наградаларҙы тапшырыусы район башлығының беренсе урынбаҫары Р. Ғ. Хәлилов.
Күңел торошона ауаздаш һағышлы ла, ғорурландырғыс та йырҙар яңғыраны. Район мәҙәниәт йортоноң ир-егеттәр вокал ансамбле башҡарыуындағы “Шайморатов генерал” йырын залдағылар аяғүрә баҫып тыңланы.

Гөлнара КҮСӘРБАЕВА.