Онотмаясаҡ һеҙҙе тыуған ил...

Тантаналы сара махсус хәрби операция үткәреү зонаһында батырҙарса һуғышҡан һәм үҙ ғүмерҙәрен биргән Айгиз Ғүмәров, Фәдис Сафин, Хәсән Зарипов һәм Ринат Таһировтың иҫтәлектәренә бағышланды. Геройҙарҙың ата-әсәләре, ҡатындары һәм балалары саҡырылған ине. Улар Әбйәлил еренең ҡыйыу улдарын матур хәтирәләр менән иҫкә алды. Тантаналы линейканы Әб-делмәмбәт мәктәбе директоры Гөлфиә Моратшина асты:
— Үлгәндәрҙе иҫкә алыу — беҙҙең мәңгелек бурыс. Һәр герой партаһы артында кеше яҙмышы, ҡыйыулыҡ һәм батырлыҡтың шәхси миҫалы тора. Беҙ Ватан именлеге өсөн башын һалғандарҙы оноторға хаҡыбыҙ юҡ! — тип сәләмләне Гөлфиә Хәсән ҡыҙы.
Район хакимиәтенең социаль үҫеш бүлеге начальнигы Гөлдәр Рәхимова, «Ватан һаҡсылары» фондының социаль коорди-наторҙары Илнур Ҡарабулатов менән Дилә Ғәлиуллина ла һәләк булған егеттәрҙең яҡындарының ҡайғыһын уртаҡлашты һәм уларға сабырлыҡ теләне.
— Илебеҙҙең ҡыйыу һалдаттарының хәтерен мәңгеләштереү — Ватанды һаҡлаусылар алдындағы изге бурысыбыҙ. Беҙҙең тағы ла мөһим бурыс — киләсәк быуынды улар миҫалында тәрбиәләү, мәрхүмдәрҙең туғандарын һәм яҡындарын иғтибар һәм хәстәрлек менән уратып алыу. Шундай илһөйәр улдар тәрбиәләгән ата-әсәйҙәр алдында баш эйәбеҙ. Мәрхүмдәрҙең рухтары шатланып ҡайтһын, — тине Гөлдәр Әхмәҙулла ҡыҙы. — «Герой партаһы» балаларҙа Ватан тарихына хөрмәт уятыу, илһөйәрлек тәрбиәләү, илебеҙҙең үткәненә, бөгөнгөһөнә һәм киләсәгенә байҡау яһау, Бөйөк Ватан һуғышы һәм төрлө локаль һуғыштарҙа ҡатнашҡан яугирҙәргә ихтирам уятыу, уларҙың исемдәрен мәңгеләштереү, рәхмәт белдереү маҡсатында булдырылған проект. 
Артабан уҡыусылар мәрхүм булған егеттәрҙең биографиялары менән таныштырҙы,  ҡыйыу башҡорт егеттәренең йәнен-тәнен аямайынса Ватан именлеге өсөн көрәшкәндәренә шаһит булдыҡ. Ошо урында ирекһеҙҙән Мәлик Харистың «Хат» шиғырындағы
«Батырҙарын иҫкә алған саҡта 
Онотмаһын мине лә Тыуған ил,  
тигән юлдары иҫкә төштө. 
Парталарҙы асыу хоҡуғы уларҙың ата-әсәләре Фәнүзә Исрафил ҡыҙына, Ләйсән Йыһанур ҡыҙына, Айһылыу Низам ҡыҙына, Рәхимә Әхмәт ҡыҙы менән Ришат Ҡауый улына бирелде, күптәр күҙ йәштәренә ирек бирҙе. Һағышлы ла, моңһоу ҙа саранан уҡыусылар ғорурланыу тойғоһо менән таралһа, ата-әсәләрҙең ҡайғылары яңырҙы.
Тантаналы сараны Әбделмәмбәт урта мәктәбе уҡыусыларының илһөйәрлек рухы менән һуғарылған шиғырҙары, йырҙары биҙәне.
Геройҙарға мәңгелек дан! Бындай парта артында ултырыу хоҡуғы уҡыу алдынғыларына, активистарға бирелә. Әбделмәмбәт еренең күренекле улдарының рухтары шат булһын, «Герой партаһы» сигенеү белмәгән Салауат тоҡомдарын патриотик тәрбиәләүгә хеҙмәт итһен. 

Ринат Таһиров 1980 йылда Мәхмүт ауылында донъяға килгән. Әбделмәмбәт урта мәктәбендә туғыҙынсы класты тамамлағандан һуң, 93-сө һөнәрселек училищеһында тракторсы-машинист һөнәрен үҙләштерә. Оҙаҡ йылдар Магнитогорск ҡалаһының «Мостострой» ойошмаһында хеҙмәт итә. Ағымдағы йылдың 9 июлендә үҙ теләге менән махсус хәрби операцияға юллана, өлкән уҡсы-сапер вазифаһында хеҙмәт юлын намыҫ менән үтәй. Үкенескә күрә, 29 августа яҡташыбыҙҙың ғүмере өҙөлә. Үлгәндән һуң Батырлыҡ ордены менән наградланған.

Хәсән Зарипов 1984 йылда Таҡһыр ауылында донъяға килгән. 1-9-сы кластарҙа Әбделмәмбәт урта мәктәбендә белем ала. 2002 йылдың ноябрендә Рәсәй Ҡораллы Көстәре сафына хәрби хеҙмәткә саҡырыла. Ил алдындағы изге бурысын үтәп ҡайтҡас, төрлө ойошмаларҙа эшләй. Өйләнә. Бер улға, ике ҡыҙға атай. 2024 йылдың 23 ғинуарында Рәсәй Федерацияһы Оборона министрлығы менән контракт төҙөй һәм яу яланына юллана. Тик батыр яҡташыбыҙ 3 мартта хәрби бәрелештәр ваҡытында батырҙарса һәләк була. Үлгәндән һуң Батырлыҡ ордены менән наградланған.

Фәдис Сафин 1993 йылда Мәхмүт ауылының күп балалы ғаиләһендә донъяға ауаз һала. Бәләкәйҙән алсаҡ, көләс, кешеләргә ярҙамсыл булып үҫә. Бер туған ике һеңлеһенә ир туған булараҡ терәк-таяныс булып тора. Әбделмәмбәт урта мәктәбендә 1-11-се кластарҙы тамамлай. Уҡыған сағында төрлө сараларҙа һәр ваҡыт әүҙем ҡатнаша, бигерәк тә спортты ныҡ ярата, физик яҡтан сыныҡҡан егет була. Мәктәпте тамамлағас, 93-сө һөнәрселек училищеһында автомеханик һөнәрен үҙләштерә. Алыҫ Себер тарафтарында вахта ысулы менән эшләй, төҙөлөш бригадаһын етәкләй. 
18 ғинуар Рәсәй Федерацияһы Оборона министрлығы менән контракт төҙөй һәм яу яланына юллана. Ҡыҙғанысҡа, 16 апрелдә хәрби заданиены үтәгәндә батырҙарса һәләк була. Үлгәндән һуң генерал Шайморатов һәм Батырлыҡ ордендары менән наградланған.

Айгиз Ғүмәров 1992 йылда Мәхмүт ауылында күп балалы ғаиләлә тыуған. Бәләкәйҙән алсаҡ, көләкәс йөҙлө булып үҫә. Бер туған апайына һәм ике һеңлеһенә ныҡлы таяныс була. Ата-әсәһе Ҡыйғы районына күсеп китеү сәбәпле, 1-6 кластарҙа Айгиз шунда уҡый. Һуңынан Ғүмәровтар Мәхмүткә ҡайтып төпләнә. Һалдат Әбделмәмбәт урта мәктәбендә 9-сы класты тамамлай. 
2024 йылдың 16 ғинуарында контракт төҙөй һәм үҙ теләге менән һуғышҡа китә. Үкенескә күрә, 21 февралдә дошман пуляһы яҡташыбыҙҙың ғүмерен өҙә. Үлгәндән һуң Батырлыҡ ордены менән наградланған.
Гөлфиә НИҒМӘТУЛЛИНА.