Яугирҙәрҙән бүләктәр

Тупаҡ ауылының әлеге ваҡытта махсус хәрби операция зонаһында йөрөгән егеттәре Арман Мифтахов, Илсен Искәнйәров, Булат Хызыров, Тимур Алтынбаев, Салауат Баһаув һәм Бөрйән егете Ислам мәсеткә инселәп бүләк тапшырҙылар: улар бергәләп мәсеттең иҫкергән газ котелы урынына өр-яңыһын алып биргәндәр. Яҡташ яугирҙәрҙең Аллаһ йортона ниәтләп тапшырған изге ғәмәлдәре үҙҙәренә мең мәртәбә артып ҡайтһын, уларҙы тәрбиәләгән ата-әсәләренә  рәхмәт яуһын, өйҙәрендә көткән ғаиләләренә именлек теләйбеҙ. 
Махсус хәрби операцияла булған Тупаҡ егете Рушан Хызыров (һүрәттә һулдан беренсе) ауылының «Ләйсән» балалар баҡсаһына яңы йылға 10 мең һум аҡса биргән. Балалар баҡсаһының өлкән тәрбиәсеһе Айсилә Әҡсәнова әйтеүенсә, был аҡсаға төҫлө принтер алырға ҡарар иткәндәр. 
Яугир шулай уҡ улы Иҙел йөрөгән Озерный балалар баҡсаһын да бүләкһеҙ ҡалдырмаған — телевизор бүләк иткән. 
Яугирҙең әсәһе, ғаиләһе, туғандары Рушан Фәрит улының ғинуар айында ҡайтыуын түҙемһеҙлек менән көтәләр. 
Яу яланында йөрөгән барлыҡ егеттәрҙең тиҙ арала имен-һау, еңеү ме-нән әйләнеп ҡайтыуҙарын теләйбеҙ.
Р. ДАУЫТОВА.