Командирҙан Рәхмәт хаты

Гвардия полковнигы Д. Лысенко Әлфирҙе илебеҙҙең ысын патриоты итеп тәрбиәләгән ата-әсәгә командование исеменән рәхмәт белдерә.

«Беҙҙең полкта хеҙмәт итеү осоронда Әлфир үҙен тик ыңғай яҡтан күрһәтте. Махсус хәрби операция зонаһында тиңһеҙ батырлыҡ күрһәтеп, дөйөм еңеүгә ҙур өлөш индерә. Ата-балалар традицияларын лайыҡлы дауам итеп, Әлфир подразделениеның хәрби әҙерлеген күтәрә, шуның менән бергә Тыуған илебеҙҙең оборонаһын нығыта. Улығыҙ менән хаҡлы рәүештә ғорурлана алаһығыҙ. Намыҫлы хеҙмәте менән ул тик маҡтауға лайыҡ», — тигән юлдар бар хатта.

Әбделғәзе егете Әлфир Ишмөхәмәт улы ун йыл инде хәрби контракт буйынса хеҙмәт итә. 2014-2015 йылдарҙа Ватан алдындағы бурысын Амур өлкәһендә һәм Алыҫ Көнсығышта үтәп ҡайта. 2015 йылдың аҙағынан хәҙергәсә Силәбе өлкәһендә — Сыбаркүлдә контракт буйынса хеҙмәт итә. Әлфир үҙенең юлын инженер ғәскәрҙәре менән бәйләй.

2021 йылдың ноябренән 2022 йылдың июленә тиклем үҙенең подразделениеһы составында таулы Ҡарабахтағы (Әрмәнстан) Рәсәй тыныслыҡ контингентына командировкаға ебәрелә. Ватанға намыҫлы, тоғро хеҙмәте «Үҙәк хәрби округында хеҙмәт иткәне өсөн» миҙалы менән билдәләнә.

2022 йылдың декабренән кесе сержант Донецк һәм Луганск халыҡ республикаларын һаҡлау буйынса махсус хәрби операцияла ҡатнаша. Хәрби бурысты үтәгән ваҡытта дошмандың миномет уты аҫтында танк һөжүме маршрутында урынлашҡан юлды минаһыҙландырып, II дәрәжә «Хәрби батырлыҡ өсөн» миҙалы менән бүләкләнә.

2023 йылдың июнендә даими дислокация пунктына ҡайта, шунан һуң тыныслыҡ урынлаштырыу өсөн Сүриәлә барған ығы-зығыларҙы көйләүгә китә. Ошо уҡ йылдың сентябренән кесе сержант Заевфратье эргәһендә электрик-дизель белгесе вазифаһында хеҙмәт итә, унда үҙенә йөкмәтелгән бурыстарын намыҫлы үтәй һәм «Хаҡ-Әл-Сүрә» терәк базаһын электр энергияһы менән тәьмин иткән дизель генераторының өҙлөкһөҙ эшләүен тәьмин итә. Сүриәлә үҙенең хеҙмәт бурысын намыҫлы үтәгәне өсөн «Сүриәләге хәрби операцияла ҡатнашыусы» миҙалына лайыҡ була.

Бөгөн ул Украина биләмәһендә механик-водитель булараҡ хәрби бурысын үтәй. Батыр яҡташыбыҙ, һәр саҡтағыса, МХО зонаһында ла хәрби бурысын намыҫ менән үтәүе менән айырылып тора. Ҡаһарман егеттең артабан да һынатмай, илебеҙгә  еңеү яулап, имен-һау әйләнеп ҡайтыуын теләйбеҙ.

Р. ДАУЫТОВА.