"Балаларымдың киләсәген уйлап..."

Украинала күкрәп неонацизм сәскә атҡан мәлдә күп ир-егеттәр үҙ теләктәре менән дошманды тар-мар итергә, Еңеүгә үҙ өлөштәрен индерергә тип яу яланына юлланды. Шундай егеттәребеҙҙең береһе – Йәлембәт ауылынан Марат Ғүмәров.

Марат Хәсән улы тыуған ауылында башланғыс кластарҙа белем алғандан һуң, Таштимер мәктәбендә 5-9-сы кластарҙы уҡыуын дауам итә. Һуңынан 93-сө һөнәрселек училищеһында тракторсы-машинист һөнәрен үҙләштерә. Магнитогорск ҡалаһының “Уралспецмаш” ойошмаһында быраулаусы булып эш башлай.

2013 йылда Марат Тупаҡ ауылы ҡыҙы Гөлдәр менән сәстәрен-сәскә бәйләйҙәр. Йәш ғаиләлә бер-берт артлы ике ҡыҙ һәм бер малай донъяға килә. Бөгөн Камилаға 11, Сафияға 10, ә кескәй Айҙарға 3 кенә йәш. Ғаилә атайҙан ҡалған нигеҙҙе һыуытмай, Йәлембәт ауылында гөрләтеп донъя көтә.

“Хәсән” позывнойлы яҡташыбыҙ 2024 йылдың 15 сентябрендә Чечня Республикаһының “Ахмат” махсус отряды аша контракт төҙөп, яу яланына юллана. Харьков йүнәлешендә уҡсы булып хеҙмәт итә. Әле яугир 4 ай алғы һыҙыҡта булып, утты-һыуҙы күреп, 15 көнгә отпускыға ҡайтарылған.

• Грозный ҡалаһында бортҡа 120 кеше йыйылғас та, беҙҙе Луганск өлкәһенә 10 көнгә

хәрби уҡыуҙарға ебәрҙеләр. Командирҙың бойороғо буйынса 60 кеше Курск, 60 кеше Белгород өлкәһенә юлландыҡ. Күбеһенсә оборонала торабыҙ, һөжүмде кире ҡағабыҙ, биләмәгә килеп төшкән пилотһыҙ осоу аппараттарын юҡ итәбеҙ. Шулай уҡ дошман биләмәһенә осоролған ҡорамалдарға шартлатҡыстар, дошман техникаһына ҡаршы миналар ҡуйыу менән шөғөлләнәбеҙ. Был яуҙы бушҡа ғына “дрондар һуғышы” тип атамайҙар. Ҡайһы бер миналарҙы урында уҡ юҡ итәбеҙ, бәғзеләрен ситкә сығарып шартлатыу мөмкинлеген ҡарайбыҙ. Баштараҡ был эш хәүефле, ҡурҡыныс кеүек ине, хәҙер өйрәндек инде, - тине әңгәмәсем.

Яугир әйтеүенсә, ниндәй генә милләт кешеһе менән бергә хеҙмәт итмәй ул. Башҡорт, ҡаҙаҡ, ҡырғыҙ, чечен, урыҫ, татар һәм башҡалар. Хатта чечендар халыҡ һаны буйынса әҙерәк икән, ә Әбйәлилдән бөтәһе 15 егет иҫәпләнә. Тупаҡ, Хәлил ауылы егеттәре, хатта үҙенең ауылдаштары менән бергә бер командир ҡулы аҫтында илгә тоғро хеҙмәт итә улар. 10 көн алғы һыҙыҡҡа сыҡһалар, 10 көн тылда торалар. “Дошман төнөн “Баба-Яга” дрондары менән һөжүм итһә, көндөҙ күберәк “Камикадзе”лар менән алышабыҙ. Һуғышҡа бөтә кәрәк-яраҡ әйберҙәр бар, Аллаға шөкөр. Иң ҡурҡынысы – дрондарҙың осоуы һәм аяҡ аҫтындағы миналар. Йоҡо бик һирәк эләккән мәлдәрҙә көн менән төндө бутаған саҡтар ҙа булғылай. Ҡайҙа барғанымды аңлап барғанға күрә, уныһына түҙерлек. Ашау яғы ла бик яҡшы, үҙебеҙҙең склад бар, шунан инеп нимә теләйһең, шуны алып бешереп ашайһың. Дағстан, Чечня яҡтарынан гуманитар ярҙам күп килә. Тик ҡайһы ваҡыт үҙәккә үтеп кәләште, балаларҙы, тыуған яҡты һағындыра”, - тип ихлас бәйән итте “Хәсән”.

Отпускыла саҡта көндәрҙең оҙаҡ үтеүен, иптәштәрен һағыныуын белдерҙе яугир. Үҙе менән булған хәлде лә һөйләп үтте яҡташыбыҙ.

- Тылда инек. Бер егет блиндаждан сығыуға ҡапыл ғына дрон һөжүм итте. Уның ике аяғы яраланды, мин тиҙ генә аяҡтарын жгут менән бәйләп, госпиталгә оҙатып өлгөрҙөм. Үҙе тере ҡалды, тик бер аяғын һаҡлап алып ҡала алманылар. Дошман да иҫәр түгел. Ҡайһы тирәлә блиндаждарҙың урынлашыуын белеп алғас, киске сәғәт 10-дан алып таңғы 4-кә тиклем бер-бер артлы дрон ташлап тик торҙо, әммә беҙ егеттәр менән ул һынауҙы лайыҡлы үттек, - тип бәйән итте Марат.

Дрондар һөжүм иткән ваҡытта үҙенең ғүмерен ҡурҡыныс аҫтына ҡуйып, хеҙмәттәшен һаҡлап алып ҡалғаны өсөн Марат Хәсән улы “Звезда Ахмата” наградаһына дәғүә ителгән. Әле яугир уны ҡулына алып өлгөрмәгән.

Әйткәндәй, Марат Хәсән улының бер туған ағаһы Вадим да махсус хәрби операцияла булып ҡайтҡан. Ул иһә МХО-ла ярты йыл самаһы хеҙмәт иткән. Яраланыу сәбәпле, ялға ҡайтарыла. Ләкин мина ярсыҡтарын ала алмау сәбәпле, ул хәрби комиссияны үтә алмаған.

Ҡайныһы Рафаил Ғиниәтов та шунда икән. Ул Рязань ҡалаһының һауа-десант ғәскәрҙәре аша юлланған, бөгөн иһә Бахмут йүнәлешендә үҙ бурысын тоғро үтәй.----Бер ғаиләнән ике яугир. Әсәйегеҙ нимәләр кисерҙе һеҙ контракт төҙөгәс?

-Шуға ла Вадим ағайға һуғышҡа кире бармау мөмкинселеге килеп сыҡҡас, сәләмәтлеге ҡаҡшағас, уны ҡалдырҙыҡ. Әсәй ныҡ булырға тырыша инде. Ялға ҡайтҡанда изге теләктәрен әйтеп, фатиха биреп оҙатып ҡала. Ағайым яҡындарымды иғтибар-хәстәрҙән өҙмәй.

– Алла бирһә, һуғыш бөтөр. Күңелегеҙҙә ниндәй уй-ниәттәр йөрөтәһегеҙ?

– Иң ҙур теләк – тиҙерәк һуғыш бөтһөн! Барыһы ла яҡшы булыр, тип ышанам. Ошо ышаныс алға барырға көс бирә, иртәгәһе көнгә өмөт уята.